Allen^a) den, die disen brief ansehent oder ho^erent lesen, kúnden wir dis nachgenanten Johans Koch priester von sant Gallen vnd Ru^edi Koch sin elicher || brůder, alz die erwirdigen v´nser gna^edig herren Cůno von gottes gnaden abt vnd daz capitel gemainlich des gotzhus ze sant Gallen¹ v´ns || ze libding geben ha^vnt fúnf pfund haller ia^erlichs geltes vsser iro stúr in dem ampt ze Huntwile², dieselben fúnf pfund haller gelts Amars || von Luterberg³ werend pfand warent von dem obgenanten gotzhus ze sant Gallen vnd von demselben Amar von Luterberg ich obgenanter Johans Koch sú erlo^est ha^vn mit sehtzig pfund gůter haller mit der obgenanten miner herren gunst vnd willen, alz der brief wol wist, den wir von inan dar vmb inne ha^vnt, da veriehen vnd bekennen wir offenlich mit disem brief, daz in derselben sach vnd libding gebung mit namen vnd mit bedingoten worten beredt ist, daz die obgenanten v´nser herren noch ir nachkomen die obgenanten fúnf pfund haller libdings nit ablo^esen noch abkoffen sont noch mugent bi minem des obgenanten Johansen Kochs leben. Wenn aber ich derselb Johans Koch abgestorben bin, bescha^ech dann, daz ich der obgenant Ru^edi Koch denselben her Johansen minen brůder v´berlebti vnd daz libding an mich vieli, so sont vnd mugent dann darnach die obgenanten v´nser gna^edigen herren ald ir nachkomen die vorgedahten fúnf pfund haller gelts libdings ab vnd vsser der obgenanten stúr von mir obgen(anten) Ru^edin Koch wol abkoffen ledgen vnd lo^esen mit drissig pfunden gůter vnd gena^emer haller, welhes iares si went vnd mich den obgenanten Ru^edin Koch derselben drissig pfund haller samen vnd mit ainander bezalent vor sant Johans tag des To^vffers ze sunnwendi, vnd sol ich mich och derselben drissig pfund haller lassen bezaln, wenn ich dar mit von den obgenanten minen herren ald von iren nachkomen ald von iren botten ald amptlúten ermanot wirt, vnd sol mich der losung in dehain wis nit sperren, vnd sol och dann zestett a^vn allen fúrzug vnd widerred denselben minen herren iren brief von des libdings wegen widergeben vnd si vnd ir gotzhus dar vmb ledig lassen. Bescha^ech aber, daz ich obgenanter Ru^edi Koch mich der losung sperti ald sumig wa^eri an den drissig pfund hallern ze enpfahent, so mugent die obgenanten min herren ald ir nachkomen dieselben drissig pfund haller, ob si gern went, gen Costentz ald gen Lindow⁴ in die múns ze minen handen legen ald senden, vnd sont dann also dar mit die vorgedahten losung gantzlich volfu^ert ha^vn in glicher wis, alz ob ich dasselb gelt alles ze minen handen von inan enpfangen hetti, a^vn geua^erd. Losten aber si dehaines iares nach dem egenanten sant Johans tag, so sol mir obgen(anten) Ru^edin Koch doch desselben iares dar nach vf den na^ehsten sant Hylarien tag daz obgeschriben libding fúnf pfund haller veruallen sin vnd nachvolgen a^vn allen fúrzug vnd widerred a^vn geuerd. Vnd wenn aber wir obgenanten Johans Koch vnd Ru^edi Koch sin brůder baid von todes wegen abgangen sint, die obgenanten v´nser herren^b) ald ir nachkomen haben von mir obgen(anten) Ru^edin Koch die losung vor e daz ich absturbi geta^vn, alz vor beschaiden ist, oder nit, so sol inen vnd irem obgenanten gotzhus dann ze stett die obgeschribnen fúnf pfund haller libdings vsser der obgenanten stúr luterlich vnd frilich ledig vnd los sin vnd v´ns vnd v´nsern erben der obgedaht hoptbrief vmb die fúnf pfund haller libdings dannan hin gantzlich vnhilflich kraftlos vnd vnnútz sin vnd den obgenanten v´nsern herren vnd iren nachkomen vnd irem gotzhus vnscha^edlich sin gantzlich a^vn aller v´nser erben vnd a^vn allermenglichs von v´nsren wegen sumen ierren vnd widerred luterlich a^vn geuerd. Vnd des alles ze offem vrkúnd der warhait so ha^vn ich obgenanter Johans Koch priester min insigel fúr mich vnd fúr min erben offenlich gehenkt an disen brief. Vnd wan aber ich obgenanter Ru^edi Koch aigens insigels nit ha^vn, so han ich erbetten den wisen wolbeschaidnen Johansen Ho^eren ze den ziten burgermaister ze sant Gallen, daz er sin insigel fúr mich offenlich gehenkt ha^vt an disen brief, des och ich ietzgenanter burgermaister vergich, daz ich von des obgenanten Ru^edi Kochs ernstlichen bett wegen min insigel fúr in mir vnd minen erben vnscha^edlich offenlich gehenkt ha^vn an disen brief. Der geben ist an sant Marien Magdalenen aubent, do man zalt von Cristus gebúrt drúzehenhundert vnd ahtzig iar, dar nach in dem ahtenden jar.

Source Fulltext: Chartularium Sangallense X, Nr. 6279, S. 523-525.