Wir graue Růdolf von Hohenberg¹ obrester schenk des gotzhus ze sant Gallen veriehen vnd tu^en kunt mit disem brief || allen, die in ansehent lesent oder ho^erent lesen, als v´ns der erwirdig herre abt Geori von gottes gnâden abt des gotzhus || ze sant Gallen² begnadet hât vnd v´ns das schenkenampt enpfolhen hât vnd v´ns och die stat Oberndorf³ die do^erffer vnd lút || vnd gu^eter, so darzů vnd darin geho^erent, verlihen hât, das haben wir angesehen vnd haben willeklich mit bedahtem můt gesworn ainen gelerten ayd ze den hailigen mit vfgehepter hand, dem vorgenemten abt Georien sinen nahkomen vnd dem gotzhus ze sant Gallen getrúwe vnd hold ze sinn vnd ze tu^end, als ain man sinem herren von sinen lehenn billich vnd von reht tůn sol, vnd och von dem schenkenampt vff dem veld vnd in der herberg ze tu^end, was ain schenk von sinem ampt tůn sol vnd als vntz her sitte vnd gewonlich gewesen ist, ân geua^erd. Wir haben v´ns och fúr v´ns vnd fúr alle v´nser erben gen dem vorgenemten abt Georien vnd gen allen sinen nahkomen des vorgeschriben gotzhus verbunden vnd verbinden v´ns mit gůter vorbetrahtung mit disem brief, das wir vsser dem selben schenkenampt noch vsser der stat Oberndorf noch vsser den do^erffern noch vsser den lúten vnd gu^etern, die darzů vnd darin geho^erent, nút tůn so^ellent noch zů niemans handen in enkain wis bringen so^ellent danne mit des vorgenemten abt Georien ald siner nahkomen hand willen vnd gunst. Vnd das dis alles war sie vnd sta^et belib, so hieuor an disem brief geschriben stat, so haben wir graue Růdolf von Hohenberg da vorgenemt vnser insigel gehenket an disen brief. Der geben ist ze Rotenburg⁴, do man zalt von gottes gebúrt drúzehenhundert iar, sibenzig iar, darnach in dem fúnften jare, an dem na^ehsten ma^entag nah sant Hylarien tag.

Source Fulltext: Chartularium Sangallense IX, Nr. 5433, S. 110-111.