Ich^a) V^olrich von Roggwille¹ ritter gesessen ze der Vordern Stoffeln² tůn kvnd vnd vergich des offenlich an disem gegenwirtigen brief || allen, die in ansehent oder ho^erent lesen, daz ich ains rehten redlichen ewigen koffes v´ber ain komen bin mit dem wolbeschaiden || Hainrichen von Tettikouen³, den man nempt der Búndrich, búrger ze Costentz, also ich hab an barem gůt von dem selben Hainrich von || Tettikouen^b) enpfangen drú hundert pfunt gůter vnd ga^eber haller, die ze Costentz geng vnd ga^eb sint, vnd bin och der ga^entzlich von im gewert vnd hab daz selb gůt in ainen redlichen nvtz geben vnd bekert, vnd daz ich dem selben Hainrich von Tettikouen vnd sinen erben fúr mich vnd min erben vmb die selben haller hab ze koffent geben reht vnd redlich vnd ains iemer werenden ewigen koffes min vogty ze Obrensvmbry⁴ v´ber lút vnd v´ber gůt v´ber akker vnd wisen v´ber holtz vnd v´ber veld v´ber zwinng vnd v´ber ba^enne vnd v´ber gericht, daz ja^erlichs giltet ze rehtem vogtreht fúnff viertal kernen vnd fúnff viertal haber alles Costentzer mess, sehsthalben mut kernen, drye mút haber vnd vierdhalb viertal haber, daz alles Byschoffzeller⁵ mess, zwainzig vastnaht hu^enr, zwai hundert ayger vnd den pfunt schilling vnd darzů vier pfunt sibentzehen schilling vnd ain pfenninng alles gůter pfenning Costentzer mv´ns, also vnd mit den selben rehten, als ich daz besessen gehebt vnd genossen hab vnd als es an mich komen vnd braht ist, es sie benempt ald vnbenempt nv´t vssgelassen, hab ich och die selben vorgenanten vogty mit aller zů geho^erd dem selben Hainrich von Tettikouen vnd sinen erben fúr mich vnd min erben ze koffent geben fúr reht lehen von ainem byschoff von Costentz vnd hab im och die selben vogty gefergot vnd vff geben vor ainem gna^edigen herren byschoff Burkart von Costentz⁶ vnd habe mich daruber verzigen vnd verzihe mich offenlich mit disem brief aller aigenschaft aller lehenschaft aller vorderung vnd an sprach vnd als ain rehten, so ich an der selben vogty gar ald an dehainem tail ie gehebt hab oder ich ald min erben iemer daran gewinnen mo^ehtent, es sie mit gericht ald âne gericht, vnd hab och darzů disen redlichen koff gen dem selben Hainrich von Tettikouen getan vnd vollefu^ert mit allen den worten werken ra^eten vnd geta^eten vnd mit aller kraft, so darzů hort vnd notdúrftig waz nach gewonhait vnd nach reht, vnd hab och darzů gelobt fúr mich vnd min erben, des selben koffes reht wer ze sind gen dem selben Hainrich von Tettikouen vnd gen sinen erben fúr reht lehen von Costentz nach reht âne alle geuerde. Vnd ze warem vnd offem vrkv´nd aller dirre vorgeschriben ding gib ich der selb V^olrich von Roggwille fúr mich vnd min erben dem selben Hainrich von Tettikouen vnd sinen erben darúber disen brief mit minem insigel besigelt. Dirre brief ist ze Costentz geben, do man von Cristes gebúrt zalt drúzehenhundert jar, darnach in dem nún vnd ahtzigosten jar, an dem na^ehsten zinstag nach sant Hilaryen tag.

Source Fulltext: Chartularium Sangallense X, Nr. 6305, S. 549-550.