+ Innocentius episcopus servus servorum dei dilecto filio Uuarnero abbati monasterii sancti Galli¹ eiusque successoribus regulariter substituendis in perpetuum. + Licet omnibus fidelibus debitores ex iniuncto nobis a deo apostolatus officio ac benivolentia existamus, illis tamen propensiori cura nos convenit imminere et ecclesiis sibi commissis suam iustiam^a) || conservare, quos ad sedem apostolicam specialiter pertinere et de ipsius proprietate constat existere. Hoc nimirum intuitu dilecte in domino fili Warnere abbas tuis petitionibus clementer annuimus || et monasterium sancti Galli, cui deo auctore presides, ad exemplum predecessoris nostri bone memorie Johannis pape˛² presentis scripti patrocinio communimus, statuentes, ut quascumque possessiones, quecumque bona in presentiarum idem locus iuste et canonice possidet aut in futurum largitione regum, liberalitate principum, oblatione fidelium seu aliis iustis modis deo propitio poterit adipisci, firma tibi tuisque successoribus et illibata permaneant, adicientes etiam, ut libertates atque prerogativa^b), per privilegia predecessorum nostrorum pie recordationis Burchardus³ quondam provisor ipsius loci a sede apostolica impetravit, tibi tuisque successoribus inviolata serventur, ut videlicet nulla e˛cclesiastica secularisve potestas seu cuiuslibet conditionis aut ordinis contra voluntatem abbatis et fratrum idem monasterium intrare presumat nec in quibuslibet titulis, e˛cclesiis, decimis, patrimoniis^c) seu quibuslibet possessionibus ad eundem locum venerabilem pertinentibus imponere audeat nec quolibet argumenti ingenio in prefato monasterio divinum presumat officium interdicere, set^d) potius sicut ab antiquo et usque ad hec tempora idem monasterium in sua libertate permansit, ita sub apostolice˛ sedis tuitione imperpetuum perseveret. Sanccimus etiam, ut decimas et possessiones, quas advocatus eiusdem loci sufficientibus testibus vel iuramento ipsi monasterio vendicare vel confirmare potuerit, nulli umquam reddere compellatur. Decernimus ergo, ut nulli omnino hominum liceat idem monasterium super hac nostra concessione ac confirmatione temere perturbare vel eius possessiones auferre vel ablatas retinere, minuere seu aliis quibuslibet molestiis fatigare, sed omnia integre conserventur eorum, pro quorum gubernatione ac sustentione concessa sunt, usibus omnimodis profutura. Si qua sane in posterum ecclesiastica secularisve persona hanc nostre˛ constitutionis paginam sciens contra eam temere venire temptaverit, secundo tertiove commonita si non congrue satisfecerit, potestatis honorisque sui dignitate careat reamque se divino iudicio existere de perpetrata iniquitate cognoscat et a sacratissimo corpore ac sanguine dei et domini redemptoris nostri Iesu Christi aliena fiat, cunctis autem eidem cenobio sua iura servantibus sit pax domini nostri Iesu Christi, quatenus hic fructum bone˛ actionis percipiant et premia^e) e˛terne˛ pacis inveniant. Amen. Amen. Amen.||
(R) f) Ego Innocentius catholice˛ ecclesie˛ episcopus subscripsi (BV).||
+ Ego Lucas presbyter cardinalis tituli sanctorum Johannis et Pauli⁴ subscripsi.||
Dat. Laterani per manum Aimerici sancte˛ Romane˛ ecclesie˛ diaconi cardinalis et cancellarii⁵, II. idus april. indic. II. dominice incarnationis anno millesimo C°.XXXVIIII. pontificatus domni Innoc(entii) pape II. anno X.

Source Fulltext: Chartularium Sangallense III, Nr. 898, S. 21-22.