In dem namen vnsers herren. Allen den, die disen gegenwrtigen brief lesent alder ho^erent lesen, den kvnde ich Fride||rich graven Kraftes svn von Toggenbvrch¹, dc sich min veterre grave Friderich vnd^b) grave Willehelm² vnd || min brv^oder grave Diethelm³ enzigen hant des eigens an dem hove ze Hemberc⁴ mit allem rehte, swaz sv daran || hetton, in mine hant fvr ein ledig eigen. Dc beschach an sante Hylaerien abende in der stat ze Vzzenach⁵. Dc selbe eigen gab ich da zehant vnserre vrown vnd dem convente von Maggeno^vwe⁶ an der selbvn stat fvr ein ledig eigen. Des svn wir alle viere, die da vor genemet sint, iro wem sin nah rehte. Des ist gezvg herre Niclavs der lvpriester vnd herre Peter der Scriber vnd Albreht ab Egge⁷ vnd H. von Wachingen⁸ vnd herre V^olrich Hirni vnd H. der Fvrderer vnd H. der Gir. Vnd dc diz staete belibe, dc da vor gescriben ist, dar vber han ich Friderich graven Kraftes svn vnd min vetere grave Friderich vnserv insigele zeinem staeten vrkvnde ane gehenchet. Dirre brief wart gegeben an dem tvsendosten vnd zwei hvndertosten vnd siben vnd sibenzegosten iare nach gottes gebvrte an sante Hylarien tage.

Source Fulltext: Chartularium Sangallense IV, Nr. 1981, S. 151.