Heinr. dei gratia abbas monasterii Heremit(arum)¹ ordinis sancti Benedicti Constanciensis dyocesis universis Christi fidelibus presentium inspectoribus subscriptorum || notitiam cum salute. Ne acta hominum oblivioni tradantur, expedit, ut per scripture testimonium in thesauris memorie re||condantur. Noverint itaque universi et singuli, quos nosse fuerit oportunum, quod Adelheidis nata quondam Johannis de Wagen², || civis in Raprechtswile³, que patri suo predicto in tercia parte mansus in villa Wagen siti hern Antonien gv^ot dicti iure proprietatis ad nos pertinentis hereditario iure legittime successerat, ad nos veniens et saluti anime prospiciens eandem partem suam eiusdem mansus et, quicque iuris habuit in eodem mansu, ad manus nostras resignavit sponte libere et expresse, Nicholao filio Joh. dicti Sellosen de Raprechtswile marito suo auctorante et consentiente, petivit supplicans humiliter et instanter, ut nos eandem partem suam ipsius mansus religiosis in Christo . . abbatisse et conventui cenobii de Wurmespach⁴ concedere dignaremur. Nos igitur ipsius piis precibus annuentes terciam partem mansus predicti prefate Adelh. iure hereditario pertinentem prefatis abbatisse et conventui immo et ipsi cenobio de Wurmespach concedimus et concessimus pro annuo censu videlicet dimidia libra cere quo ad terciam partem ipsius cere, cum de toto mansu ipso dimidia libra cere solvi debeat singulis annis nobis nostroque monasterio, festo Martini persolvendo iure hereditario perpetuo possidendam, ea potissima ratione, quod due sorores ipsius Adelh. videlicet Margreta et Elisabeta in eodem cenobio degunt et duas partes suas predicti mansus ad idem cenobium transtulerunt. Renunciavit insuper predicta Adelh. pro se et suis heredibus omni iuri, quod sibi in prefato mansu competiit vel competere potuit tam de facto quam de iure, promittens, quod super predicto mansu prefatis abbatisse et conventui numquam per se vel alium movebit aliquam questionem. In huius rei testimonium presens instrumentum tradimus sepedictis . . abbatisse et conventui cenobii de Wurmespach nostro sigillo munimine^a) roboratum. Testes huius rei sunt: honorabilis dominus R. thesaurarius ecclesie Constanciensis⁵, Wernh. Biberli civis Thuricensis, Heinr. Lezze senior, H. notarius noster, Lutoldus notarius de Thurego et alii quam plures. Dat. Thuregi, feria secunda proxima ante festum beati Mauricii anno domini M°. CC°. LXXXXVII°. ind. X^a.

Source Fulltext: Chartularium Sangallense IV, Nr. 2433, S. 498.