Wir Vlrich von Wilberg¹ corherre der gestift ze Lindow² vnd Johans von Wilberg³ gebrůder vergehen mit disem brief, || daz wir von dem erwirdigen vnserm gna^edigen herren abt Johansen von Pfa^euertz⁴ vnd sinem gotzhus habend || enphangen baid vnuerschaidenlich disú nachgeschribenn gu^eter, dez ersten den wald ze Bollingen⁵, item Gross V^elis hof || ze Bollingen, item dez Schniders hof, item dez Schna^etzers hof, item V^elis Engellmen hof vnd die reban, dz alles gelegen ist ze Bollingen obrend Wurmspach⁶ vnd vndrend Schma^ericon⁷, vnd dartzů a^ellu dú lehen, die Ott sa^elig von Rambach miner seligen elichen husfrowen fro Vrsellen vatter von dem gotzhus ze Pfa^euers ze lehen hatt vnd ouch vielent an die vorbenempten fro Vrsellen sin tochter miner elichen wirtenn, dú lehen mir Hansen si fůgt vnd machet mit hand vnd mit gunst minez ebenempten herren dez abtz von Pfa^euers, vnd haben ouch wir vorbenemten gebrůder baid gelobt vnserm egedachten herren von Pfa^euers bi vnsren eren sinen vnd sinem gotzhus getrúwen dienst in aller der wis, as ain frumer biderb man von ainem semlichen lehen sinem lehenherren ane alle geua^erd getrúlich dienen sol. Vnd dez ze vrkúnd henken wir baide gebrůder vnsri aignú insigel an disen brief. Der geben ist ze Rappreswille⁸ in dem jar, do man zalt von gotz gebúrt drútzehenhundert jar, darnach in driu vnd sibentzigostem jar, an sant Verenen tag.

Source Fulltext: Chartularium Sangallense IX, Nr. 5374, S. 51.