In dem namen gottes amen. Mit disem gegenwúrtigen offnem vrkúnd dis briefes so sol kuntlich ze wissend sin allen, die in ansehend, das in dem ja^vr, do von Cristus gebúrt wa^vrend drúzehenhundert ja^vr siben vnd sibentzig ja^vr ze den ziten, do der hailigost in got v´nser vatter vnd herre herr Gregori von wirdiger fúrsihtikaid gottes ba^vbstlicher fúrste was vnd der sibend in dem namen an dem sibenden ja^vr sines fúrsten amptes, an dem ahtzehendosten tag des o^vgsten ma^vnot vnd ze prim zit oder vil na^vh ze der selben stund, do stůnden vor mir offnem na^vchgeschribne(n) hofschriber in gegenwúrtikaid der na^vchgeschribnen zúgen in minem hus, da^v ich inne wonhaft bin, gelegen ze Costentz an Múnstergassen¹ die beschaidnen vnd fúrsihtigen herr Johans Burgo^vwer kilchherre der lútkilchen sant Laur(encen)² gelegen ze sant Gallen, die in Costentzer bistum geho^ert, ze ainem tail vnd maister Johans Ho^er burger ze sant Gallen an namen vnd an statt der fúrsihtigen des burgermaisters der ra^et der zunftmaister vnd der gemainen gantzen statt ze sant Gallen, die o^vch in das vorgenempt Costentzer bistum geho^ert, ze dem andern tail. Vnd sprach da^v der vorgenempt herr Johans Burgo^vwer kilcherre, das er mit wolbeda^vhtem můt frilich vnd willeklich veria^ehi vnd veriehen wo^elti sich bekanti vnd erkent hetti vnd o^vch spra^echi, das es wa^vrlich also wa^er von rehter redlicher gewonhaid vnd o^vch sin so^elti, die selb gewonhaid also lang gewerot vnd behalten wa^er, das nieman geda^ehti, das es nút also gewesen wa^er, vnd die selbe gewonhaid stu^end also, das ain kilcherre der vorgenempten lútkilchen reht vnd redlich setzen vnd ordnen so^elti ainen lútpriester in die vorbenempte kilchen, in die o^vch die vorgenempten der burgermaister ra^et zunftmaister vnd gemainú statt vnderta^vn sind vnd geho^erend, vnd so^elti denne dem selben lútpriester o^vch also redlich vnd ordenlich zů fu^egen ainen andern priester im ze hilf, den man o^vch gemainlich nempt ain helfer, vnd so^elti denne der selbe lútpriester vnd der helfer das opfer vnd alle andere nútze, die dem lútpriester ampt zů geho^erend, gelichlich vnder sich selber tailen, also das ietwedrem vnder in gelicher halber tail von den selben nútzen vnd opfer wurdi vnd werden so^elti, vnd so^elti o^vch der selbe lútpriester vnd o^vch der helfer ietwedrer besunder in ainem hus in der statt ze sant Gallen sitzen vnd wonhaft sin, vnd so^eltin also bed die selben lútkilchen besingen vnd die vnderta^vn der selben kilchen reht vnd redlich berihten in go^etlichen vnd gesatzten cristanlichen sacramenten vnd hailikaid, vnd so^eltind o^vch der selbe lútpriester vnd o^vch der helfer gesetzt vnd geordnot werden mit willen vnd gunst vnd mit ra^vt der vorbenempten des burgermaisters der ra^et der zunftmaister oder des merern tails vnder in, vnd das o^ech die selben bed weder ingemaind noch intail nút gea^endrot noch versto^essen werden so^eltind a^vn ra^vt willen vnd gunst der selben des burgermaisters der ra^eten der zunftmaister oder des merern tails vnder in. Da^vrna^vch verhiess der vorgenempt herr Johans Burgo^vwer kilcherre mir offne(n) nachgeschribne(n) hofschriber an namen vnd an statt aller dero, den dis zůgeho^ert, mit geswornem aid vff der geschrift des hailigen ewangelis mit so^elichen gelerten worten, als es reht ist, das er dis vorbenempten gewonhaid vnd a^ellú stukk vnd iegliches besunder, als es an disem brief vorbeschaiden ist, vnd o^vch ander gůt vnd loblich gewonhaid, als si von alter gewonlich behalten sind, den vorgenempten dem burgermaister den ra^eten den zunftmaistern vnd der gemaind halten wo^elti vnd so^elti vnd da^vwider niemer mer tůn noch werben noch das brechen weder mit reht noch a^vn reht weder offenlich noch haimlich noch mit dehainen listen klu^eger vnd verborgner wort noch werk in dehainer wis noch in dehainer geva^erde noch vntrúw, vnd batt do der vorgenempt herr Johans Burgo^vwer kilcherre vnd o^vch der selbe maister Johans Ho^er an namen vnd an statt, als vorgeschriben ist, mich offnen na^vchgeschribnen hofschriber, das ich vmb disú vorgenempten stuk vergiht vnd gelúbt der selben stukk ain offen instrument vnd vrkúnd ains briefes machoti vnd ordnoti. Dis beschach in dem ja^vr vnd an dem tag ze der stund vnd an der statt, als vorgeschriben ist. Da^v bi wa^vrend die beschaidnen Peter Oswalt korherre in der kilchen ze sant Johans³ vnd Beringer Burg korherre in der kilchen ze Schynon⁴, die bede kilchen in Costentzer bistum geho^erend, vnd Johans Ko^eli ain laye, die alle ze Costentz wonhaft sind, die o^vch zů disen vorgenempten sachen gelúpt vnd vergiht der stukken zů rehten zúgen geru^eft vnd gebetten wa^vrend. Ich Cůnra^vdus Burg von Stain⁵ an gesworner offner hofschriber von gna^vde vnd gewalt des kaiserlichen richs, won ich mit den vorbenempten zúgen ze gegni was, do die vorgeschriben vergiht erkantnúss offnung gelúpt vnd verhaissung ze der zit vnd an der statt, als vor mit worten beschaiden ist vnd ich sah vnd hort, das es also beschah vnd gelopt ward na^vch minen gelerten worten, als es reht ist, so han ich dis offen instrument vnd vrkúnd dis briefes da^vrúber selber gemachot vnd gedihtot vnd beschikt, das es von ainem andern schriber getrúlich geschriben ist, vnd won ich zů disen sachen vergiht vnd gelúpt gesůcht vnd gebetten ward, so han ich da^vrna^vch mich selber mit miner aigner hand geschriben, vnd o^vch ze vrkúnd aller vorgeschribner dinge vnd vergiht so han ich min gewonlich zaichen gemachot vnd na^vch miner gewonhaid gelait an disen brief. Ich Johans Burgo^vwer kilcherre der kilchen ze sant Laur(encen) ze sant Gallen vergih, das dis alles also beschehen ist, vnd ze merer sicherhaid der vorgeschribnen ding so han ich min insigel gehenkt an dis instrument vnd offen vrkúnd dis briefes.

Source Fulltext: Chartularium Sangallense IX, Nr. 5607, S. 279-281.