Hiltboldus dei gracia abbas¹ totusque conventus monasterii sancti Galli ordinis sancti Benedicti diocesis Constanciensis omnibus presentes litteras inspecturis subscripltorum noticiam cum salute. Ut contractus bone fidei consensu mutuo celebrati ob utilitatem locorum religiosorum evidentem sub perpetuo robore perseverent, scripturarum indiciis || tenaci et inviolabili debent memorie commendari. Noverint||
itaque universi tam posteri quam presentes, quod cum monasterium nostrum antedictum oppressum foret gravibus || et intollerabilibus oneribus debitorum et ab eisdem non posset nisi per vendicionem rerum immobilium eiusdem, cum copia rerum mobilium, de quibus dicta possent exsolvi debita, sibi nullatenus competeret vel adesset, aliquatenus liberari, curias nostras videlicet superiorem et inferiorem in Stamhain² omnesque nostras possessiones ibidem cum hominibus utriusque sexus, iurepatronatus ecclesie ibidem site, silvis, pratis, agris cultis et incultis, viis et inviis, aquis aquarumque decursibus ipsis pertinentibus et annexis earumque pertinenciis et iuribus tam corporalibus quam incorporalibus universis, quocumque nomine censeantur, vendicioni publice decrevimus exponendas, et cum inter alios ad empcionem eandem procedere volentes vir strennuus Alberhtus de Clingemberg miles dictus de Twiel³ natus quondam Alberhti de Clingemberg⁴ militis nobis maius et utilius precium obtulisset, nos tractatu sollempni prehabito et premisso, qui circa alienaciones rerum ecclesiasticarum adhiberi debet et premitti iuxta sacrorum canonum instituta, curias et possessiones predictas cum hominibus utriusque sexus, iurepatronatus ecelesie predicte, silvis, pratis, agris cultis et incultis, viis et inviis, aquis aquarumque decursibus eis pertinentibus et annexis et cum ipsarum pertinenciis et iuribus tam corporalibus quam incorporalibus universis, quocumque nomine censeantur, eo iure eaque consuetudine, quibus nos et nostrum monasterium omnia et singula supradicta hucusque possedimus et habuimus iure proprietario seu iure directi dominii, utilis^a), eidem Alberhto de Clingemberg militi dicto de Twiel vendidimus rite et legitime ac vendidisse nos recognoscimus per tenorem presentium pro ducentis et quadraginta marcis argenti puri et legalis ponderis Constanciensis et in ipsum suosque heredes utriusque sexus omnia et singula supradicta titulo prefate vendicionis transtulimus iure supradicto et transferimus per presentes possidenda et habenda et in quascumque personas seu loca maluerint quovis titulo transferenda sine cuiusvis contradictionis obice et impedimento. Ceterum idem Albertus de Clingemberg miles dictus de Twiel volens nobis nostroque monasterio predicto graciam facere specialem, se suosque heredes obligavit voluntarie per stipulationem sollempnem ac legittimam et astrinxit ad vendendum nobis nostrisve successoribus curias et possessiones predictas cum hominibus, iurepatronatus et aliis suis pertinenciis pretaxatis pro dicta summa argenti puri et legalis ponderis supradicti sibi suisve heredibus, si eum, quod absit, premori contingerit, dandi et presentandi pondere in parato et in nos nostrumque monasterium nostrosque successores, quicumque pro tempore fuerint, venditionis titulo transferendi pro summa argenti predicta sine cuiusvis contradictionis obice et sine quolibet impedimento, ita tamen, quod potestas et gratia predicte in nos nostrumque monasterium translate per eum nomine suo suorumque heredum nobis nostroque monasterio nullatenus competant, sed totaliter sint precluse usque ad nativitatem domini nostri proxime affuturam et abinde immediate per completum septem annorum spacium, sed tantum eisdem possimus uti potestate et gracia in nos per ipsum translatis a fine dicti septennii infra tres annos proxime dictum septennium subsequentes tempore quocumque eorundem trium annorum, hoc adiecto, ut elapso dicto trium annorum spacio post finem dicti septennii nulla potestas nobis nostrisque successoribus nostrove monasterio reemendi curias et possessiones prefatas cum hominibus, iurepatronatus aliisque suis pertinenciis competat vel competere possit quovismodo, sed totaliter sit extincta, adicientes, quod empcio seu reempcio prefata fiat dumtaxat ad utilitatem perpetuam monasterii memorati et quod ipse curie dicteque possessiones cum hominibus, iurepatronatus suisque pertinenciis memoratis in ipsius monasterii dominio directo et utili remaneant nec ad aliquem alium vel alios aut ad loca quecumque per reempcionem huiusmodi quovis titulo aut modo transeant seu aliquatenus devolvantur, hoc etiam adiecto, quod quocumque predictorum trium annorum ad reempcionem dictarum curiarum cum suis pertinenciis et possessionum processerimus, si ante festum beati Johannis Baptiste hoc fecerimus, predicto Alberto de Clingemberg militi seu heredibus suis seu in quos dicte curie et possessiones cum suis pertinenciis per eum translate fuerint, nullum ius competere debet in fructibus earundem curiarum et possessionum et pertinenciarum suarum, quo ad auctumpnum iamdictum festum beati Johannis Baptiste proxime tunc sequentem. Si vero post dictum festum beati Johannis Baptiste quocumque trium annorum predictorum easdem curias et possessiones cum suis pertinenciis reemere nos contingat, tunc fructus earundem curiarum, possessionum et pertinenciarum suarum auctumpni proxime sequentis illius anni dumtaxat cedere debent predicto Alberto de Clingemberg militi et suis heredibus seu suis successoribus in eisdem, reempcione per nos facta nichilominus valitura. Pecuniam vero supradictam a prefato Alberto de Clingemberg milite de Twiel nuncupato videlicet ducentas et quadraginta marcas argenti puri et legalis ponderis Constanciensis nos recepisse et in utilitatem evidentem nostri monasterii predicti videlicet in exoneracionem debitorum eiusdem, quibus in usuris et obstagiis dampna gravia accreverunt, fore conversam, scriptis presentibus recognoscimus et publice confitemur, volentes dictam recognitionem eam vim habere, ac si in iure facta foret coram iudice competenti, adhibitis per nos in omnibus et singulis supradictis verborum ac gestuum sollempnitatibus debitis et consuetis. Et ne premissa vel ipsorum quodcumque ullo umquam possint tempore violari, renunciamus circa ipsa et quodlibet eorundem tam pro nobis quam pro nostro monasterio nostrisque successoribus realiter beneficio restitucionis in integrum, principaliter vel eciam incidenter litteris a sede apostolica vel aliunde impetratis seu etiam impetrandis, defensioni non adhibite sollempnitatis, exceptioni doli, auxilio decepcionis ultra dimidiam iusti precii, excepcionibus et defensionibus non numerate, non solute, non tradite pecunie, omnibus constitucionibus et statutis tam editis quam edendis, auxilio consuetudinis generalis vel etiam particularis, omni auxilio legum et canonum et specialer impetracioni litterarum a sede apostolica faciende, per quas res ecclesiastice, que male dicuntur alienate, repeti consueverunt, et generaliter omni auxilio et suffragio, quibus mediantibus ea, que premissa sunt, vel ipsorum quodcumque ullo umquam possent tempore violari. Et in evidenciam omnium premissorum ipsorumque incommutabilem et inviolabilem firmitatem presens instrumentum conscribi fecimus et sigillorum nostrorum nomine et vice subscripcionis per singulos ex nobis faciende, cum scribendi pericia careamus, robore communiri. Ego vero Albertus de Clingemberg dictus de Twiel miles supradictus recognosco omnia et singula supradicta pro me nomine meo meorumque heredum rite et legitime fore peracta et me meosque heredes per stipulationem sollempnem obligo et astringo inviolabiliter ad observationem et confirmationem singulorum et omnium premissorum, volens et decernens easdem recognicionem et obligacionem et precipue circa potestatem dictis abbati et conventui ipsorumque successoribus et monasterio sancti Galli predicto pro me meisque heredibus datam ad reemendum curias et possessiones supradictas cum hominibus et iurepatronatus ecclesie Stamhain predicte ipsarumque pertinenciis supradictis, prout superius est premissum, eum habere vigorem eamque firmitatem, ac si per me pro me meisque heredibus facte fuissent in iure sollempniter coram iudice competenti. Et in evidenciam roburque perpetuum eorundem hanc subscriptionem pro me meisque heredibus fieri feci et appendi presentibus sigillum meum. Datum et actum apud sanctum Gallum, anno domini millesimo trecentesimo vicesimo primo, IX°. kln. octobr. indic. quarta.

Source Fulltext: Chartularium Sangallense V, Nr. 3138, S. 417-420.