Rudolpho episcopo Constanciensi. Fraternitatis tue litteras benigne recepimus inter cetera continentes, quod tu frater ac dilecti filii nobiles viri Albertus et Otto duces Austrie confederationem validam, per quam L. de Bauaria heretico et scismatico suisque complicibus et fautoribus^a), ne regnum Alamannie occupare valeant, facere curavistis quodque super predictis intendis secundum exhortationem nostram prefatis ducibus adherere constanter, preterea quod tu et ipsi duces necnon venerabilis frater noster . . episcopus Argentinensis super tractandis et ordinandis viis et modis, quibus predicti L. suorumque complicum et sequacium dampnandis utilius obviari valeat conatibus, simul certis die et loco prefixis intenditis convenire. Nos itaque premissis diligencius intellectis fidelem tuam diligenciam et circumspectionem providam multipliciter in domino super hiis commendantes, eandem fratemitatem^b) tuam attencius exhortamur, quatinus in inceptis constanter persistens circa ea, que restant agenda, sic operosam solicitudinem, ut votivum exitum sorciantur, adhibere procures, quod divinam ac nostram et apostolice sedis gratiam uberius assequaris. Ceterum administrationem monasterii santi Galli tue diocesis tibi committendam providimus, sicut in litteris nostris¹ inde confectis plenius poteris intueri. Super aliis autem, que tue predicte littere continebant, cum tuam et aliorum quos tangit responsionem habuerimus, proponimus auctore domino, quod oportunum viderimus ordinare, et ut de hiis, que dilectus filius nobilis vir Henricus comes Palatinus Reni dux Bauarie nobis scripsit noviter, noticiam habeas pleniorem, ecce quod litterarum ipsius seriem indicabit tibi cedula presentibus interclusa. Dat. ut supra^c).

Source Fulltext: Chartularium Sangallense VI, Nr. 3408, S. 76.