Wir Elszbet von gnaden gotts ebtissenne des gotzhus ze Zurich¹ sant Benedicten ordens || in Costentzer bistům kúnden allen den,^a) disen brief sehent alder ho^erent lesen, daz fúr vns || kam Cůnrat der Wingarter phleger vnd schafner des spitals der siechen ze Raphtzwiller^b)2 mit || vollem gewalt des selben spitals vnd siner oberen, den er hatte, vnd gab vf an vnser hant an des gotzhus stat ain phunt geltes ab des vorgenanten spitals hus, daz gelegen ist ze Zúrich vffen Dorf³ vnd ainhalp stosset an der siechen hus an der Sile⁴ vnd anderunthalp stosset an . . Schmidlins hus des sutters, daz erbe ist von vnserm gotzhus, vnd bat vns, daz wir daz vorgenant phunt geltes eweklich ze rihtenne lúhen den Bredieren ze Zurich⁵ vnd iro hus an ain ewiges liehte, daz vor vron alter brinnen sol, ze rehtem erbe von vnserm gotzhus. Die bet erhorten wir vnd lúhen daz vorgenant phunt geltes den Bredieren eweklich ze rihtenne an daz vorgenant lieht ze rehtem erbe, mit der gedinge, daz der vorgenant spital daz vorgenant phunt geltes nit rihten sol, ê daz Katherine Rinderharin erstirbet, swanne dú erstirbet, so sol der vorgenant spital ald swer daz vorgenant hus ie danne inne hat daz vorgenant phunt geltes eweklich vnd ia^erliches rihten ze sant Martins tag den vorgenanten Bredieren an daz vorgenant lieht. Sich entzeh o^vch der vorgenant Cůnrat der Wingarter phleger vnd schafner des vorgenanten spitals mit vollem gewalt, den er dar zů hatte, an des selben spitals stat alles des rehtes vorderunge vnd ansprach, so er ald sú, die danne des spitals phleger sint, dehaine wise gehaben mo^ehtent ald gewinnen an gaischlichem ald an weltlichem gerihte, vnd bant sich dar zů vnd den vorgenanten spital vnd iro nahkomen, wer zesinne des vorgenanten phunt geltes nah rehte fúr reht erbe von vnserm gotzhus vnd die vorgenanten Bredier ze versprechenne nah rehte, wa ald wenne sú es bedurfent, ob sú dar vmbe angesprochen wurdent. Vnd hie v´ber, daz dis war si vnd sta^ete belibe, so geben wir den vorgenanten Bredieren disen brief besigelt mit vnserm offen insigel. Vnd ze ainer meren sicherhait so henken wir der^c) vorgenant Cůnrat der spital maister vnd die^d) dúrftigen des vorgenanten spitals vnseres spitals insigel an disen brief. Dis beschach vnd wart dirre brief gegeben^e) ze Zurich, do man zalte von gottes gebúrte drúzehenhundert iare vnd dar nah in dem ain vnd drisgosten iare, an dem gůtemtage vor sant Martis tag.

Source Fulltext: Chartularium Sangallense VI, Nr. 3473, S. 123.