Wir Lvdowig von gots genaden Romischer keyser ze allen ziten merer des richs veriehen || offenlichen an disem brief, daz wir den erbern bescheiden lúten den gemeinden der telrer, die zů der || vogtey ze sand Gallen geho^ernt, daz ist ze Appazelle¹, ze Huntwiler², ze Tufen³, ze Wittabach⁴, ze Rut||munten⁵ vnd den hof ze Va^egerswile⁶ vnd allen den, die dar in geho^ernt, swie si genant sin, vnsern lieben getriwen ein so^elich genade getan haben vnd tůn o^vch mit disem brief, daz wir si noch vnser nachkomen an dem riche niht verendern, vercheren, verchummern, versetzen noch anwerden su^ellen von dem riche in keinen weg vmb keinerley sache, swie die genant ist. Vnd dar v^eber ze einem vrchu^ende geben wir in disen brief versigelten mit vnserem keyserlichem insigel. Der geben ist ze Wirtzburg, an montag nach sand Jacobs tag, do man zalt von Christes geburtt driutzehenhundert jar, dar nach in dem driw vnd drizzigistem jar, in dem niwntzehendem jar vnsers richs vnd in dem sehsten des keysertůms.

Source Fulltext: Chartularium Sangallense VI, Nr. 3521, S. 169.