Wir graf Fridrich von Toggenburg¹ kunden vnd veriehen offenlich || mit disem brief, das wir willeclich vnd bedaht mit gůtem rat vúr vns || vnd vro Kungund² hern Donatz seligen von Vatz³ elicher tohter vnd vnser eli||chen husurowen vnd alle^a) vnser erben, sun vnd tohtren, ob wir sun nut enha^eten, von dem erwirdigen vnserm gnedigen herren bischof Vlrich von Chur⁴ enpfangen hand ze rehtem lehen die burg Winegge⁵ vnd alles das, das dar zů ho^eret, vnd dar vmb so haben wir im gesworn ze den hailgen, von den lehen ze tůnd, was ain man von reht tůn sol von sinen lehen sim herren. Wir verzihen vns och willeclich vnd vnbetwungelich v´ur vns vnd die vorgenanten vnser elichen husvrowen, der vogt wir sint, vnd vur alle vnser erben vnsers tails der pfender, diu bischof Johans selig von Chur⁶ vnserm sweher vnd vatter seligen hern Donat von Vatz versetzt hat, vnd sond die brief⁷, die wir dar vmb haben, wider geben vnd sond tod sin. Wir hand vns och verzigen vur vns vnd die egenemten vro Kungund hern Donatz seligen von Vatz tohter vnd vnser vrowen, der vogt wir sind, vnd vnser erben aller der ansprach, die wir haben vnd haben mo^ehten an den zerbrochen turn, der wilend hies Spinnio^el⁸, vnd der hofstat, dú zwischend dem selben turn vnd Kurtesell⁹ ze Chur in der stat gelegen ist. Vnd des ze aim waren offen vrkund so geben wir disen brief vúr vns vnd die vorgenemten vro Kungund hern Donatz seligen von Vatz elicher tohter vnd vnser elichen huswrowen, der vogt wir sind, vnd vur alle vnser erben besigelten mit vnserm insigel. Dis beschah vnd wart dirr brief geben ze Wesen¹⁰, do man zalt von gotz geburt druzehen hundert iar, dar nah in dem aht vnd drisgosten iar, an dem fritag vor sant Lucyen tag.

Source Fulltext: Chartularium Sangallense VI, Nr. 3700, S. 289-290.