Allen, die disen brief sehent oder ho^erent lesen, kúnd ich her Johans Múller ritter schultheis Zúrich, das fúr mich kam an der stat, do ich offenlich ze gerichte sas, die edeln erwirdigen herren graf Fridrich || von Toggenburg¹ einhalb, graf Johans von Habspurg, graf Růdolf vnd graf Go^etfrit von Habspurg² gebrůdere anderhalb, vnd offenberten die selben min herren von Habspurg alle drije offenlich do vor mir vmb dis nachge||schriben zwein ho^efe, vmb den hof ze Wangen³ vnd den kilchensatz, der dorin ho^eret, vnd lehen ist von dem gotzhus ze sant Gallen, vnd vmb den hof ze Tûgen⁴, der lechen ist von dem gotzhus ze Pfeffers⁵, vmb die ho^ef beide mit || lúten, mit gu^etern, mit húsern, mit hofstetten, mit grafschaft, mit eigenschaft, mit erbschaft, mit lechenschaft, mit pfantschatz, mit gerichten, mit twingen, mit bênnen, mit túbe, mit frefni, mit holtz, mit velde, mit wûnne, mit weide, mit akern, wisen, mit vsgeleinde, mit steg, mit wêge, mit wasser rúnsen, mit erschetzen, mit vellen, mit geleste, mit wilpan fliegenden vnd fliessendem, mit cinsen, mit gesasten stúren, mit v´berstúren vnd mit allen nútzen, so zů dien selben zwein ho^efen geho^ert, si sien ietz genêmt oder werden noch genemt, si sien ietz funden oder si werden noch funden, wie die nútz geheissen oder benemt sint, vnd mit namen mit aller rechtung, friheit vnd ehafti, so zů dien vorbenemten ho^efen beiden geho^ert vnd vntz vf disen hútigen tag darzů geho^ert hat vnd si o^vch ir vordern an si bracht hant, wie dú rechtú geheissen oder benemt sint vnd iemer ieman vinden oder genemmen kan, ane alle geverd, vnd sprachent, das si die selben zwein ho^efe ze Wangen vnd ze Tuggen vnd dú zweinzig stuk geltes, dero zwelfi ze Schúbelbach⁶ gelegen sint, vnd acht stuki ze Obernhofen⁷, dú in enwedern hof geho^erent, mit aller rêchtung, friheit vnd ehafti, so zů dien selben gu^etern allen geho^ert vnd vorbenemt sint, vnd o^vch mit der bescheidenheit, als die brief stand vnd stend werdent, die ietz darv´ber geben sint oder noch darvmb geben werdent⁸, recht vnd redlich eines steten ledigen ko^vffes zeko^vffenn geben hetten fúr sich vnd ir erben vnd nachkomen dem obgenanten minem herren grafen Fridrich von Toggenburg vnd des erben vnd nachkomen vmb tuseng mark vnd vmb sechs vnd drissig mark gůtes vnd lotiges silbers Zúricher gewicht. Vnd liessent alle drij vnverscheidenlich an recht, wie si sich der vorbenemten ho^efen beider vnd der vorgeschriben zweinzig stuken geltes mit allen rechten, so darzů geho^ert, entziehen solten vnd des selben ko^vffes vor offennem gericht veriehen solten, das es nv vnd hienach gůt kraft haben mo^echte. Darvmb wart rechtes gefragt, vnd wart nach miner frage von erbern lúten an gemeiner vrteil erteilt, sit das graf Johans von Habspurg vnd graf Růdolf von Habspurg gebrůdere zů ir tagen komen weren, swes o^vch die beide do vor gericht vêriehen, vnd sich entzigen vnd o^vch sich entzigen an der herren hant vnd vertigeten, dannan dú selben gu^eter lechen sint⁹, das o^vch das nvˆ vnd hienach billich gůt kraft haben solte. Vnd sit aber graf Go^etfrit von Habspurg ir beider brůder zů sinen tagen noch nit komen were, wo der Zúrich fúr v´nser gericht stu^ende, vnd sich do bevogtety mit einem frijen hêrren, sit o^vch er ein frijer hêrr wêre vnd o^vch vnser gericht frij wer, wes o^vch er danne mit dem selben sinem frijen vogte in der sach veriehe, sich entzige, schu^ef oder tête, das o^vch das nvˆ vnd hienach billich gůt kraft haben solte. Vnd do das erteilt wart, do stůnd der vorgenant graf Go^etfrit von Habspûrg dar vnd kos im hêrn Walther V^olr. von der Alten Clingen¹⁰ frijen herren vmb die sach ze vogte. Vnd stůndent o^vch die vorgenanten graf Johans von Habspurg vnd graf Růd. von Habspurg gebrůdere dar vnd gabent dem vorgenanten grafen Go^etfrit von Habspurg ir brůder den vorgenanten hêrn Walther V^olr. von der Alten Clingen frijen herren mit miner hant ze des gerichtes wegen vmb die sach ze einem erkornen vogte, als gericht vnd vrteil gab vnd recht was. Darnach lie der vorgenant graf Go^etfrit von Habspurg an rêcht mit dem obgenanten hêrn Walther V^olr. von der Alten Clingen sinem erkornen vôgte, ob im das gericht billich sinen brief hervmb geben solte, darvmb wart rêchtes gefragt, vnd wart nach miner frage von erbern lúten erteilt, das im das gericht billich sin brief hervmb geben solten, vnd das o^vch die vorgenanten min hêrren von Habspurg alle drij vnd o^vch der vorgenant von Klingen ir ieklicher sin insigel zů minem insigel heinken solte an des gerichtes brief. Vnd herv´ber ze einem offenn vrkúnne, wan dis vorgeschriben alles vor mir beschehen ist, als gericht vnd vrteil gab vnd recht was, so han ich min insigel ze des gerichtes wegen offenlich geheinket an disen brief. Wir die vorgenanten graf Johans von Habspurg, graf Růd. von Habspurg vnd graf Go^etfrit von Habspurg gebrůdere vêriehen offenlich vmb alles das, so vor an disem brief geschriben stat, das wir do alle drije vnder o^vgen Zúrich vor offennem gericht gewesen sien vnd es alles vêriehen vnd volfu^ert haben mit aller sicherkeit, als v´ns mit gericht vnd mit vrteil erteilt wart. Vnd des ze einer mêren sicherkeit so hat o^vch v´nser ieklicher sin insigel offenlich geheinket an disen brief. Ich der vorgenant Walther V^olr. von der Alten Clingen frijer herr vergich offenlich alles des, so vor an disem brief geschriben stat, das ich dobi was vnd es sach vnd horte, vnd o^vch mit gericht vnd mit vrteil ze einem erkornen vogte vmb dis sach geben wart dem obgenanten grafen Go^etfrit von Habspûrg mit willen vnd gûnst grafen Johs. vnd grafen Růdolfs von Habspurg siner brůdern. Vnd des ze einem offenn vrkúnne so han o^vch ich min insigel offenlich geheinket an disen brief ze einer gezúgnússe, wan es mir mit gericht vnd mit vrteil erteilt wart. Dis beschach^a) vnd wart dirr brief geben Zúrich, do man zalte von gottes gebúrt drúzehen hûndert vnd viêrzig jar vnd darnach in dem dritten jare, an dem nechsten cinstag vor sant Thomans tag. Hie bi warent vnd sint dis dinges gezúge her V^olr. von Môntfort¹¹, her Amur von Luterberg¹², her Růd. Biber¹³, her Růdolf Trûchsetz¹⁴, her Heinr. Biber rittere, Růd. Brûn burgermeister Zúrich¹⁵, Jacob Brûno sin brůder, Johs. Krieg, Hug Krieg, Růdolf Herdiner vnd ander erber lúten vil.

Source Fulltext: Chartularium Sangallense VI, Nr. 3866, S. 419-421.