Wir^a) graf Johans, graf Růdolf^b) vnd graf Go^etfrid von Habspurg gebrůder kúnden allen, die disen || brief sehent oder ho^erent lesen, das wir mit vnserm lieben o^ehen grauen Fridrich von Toggenburg || lieblich vnd gu^etlich vnd nach v^ssag erberrer lúten, den wir beidenthalb getrúweten, v´berein komen || sin, ist das wir oder vnsrú geswistergit ald vnser erben sament oder sunderlich inrent den nechsten fúnf jaren, dú anuiengen an sant Thomas tag, wider ko^vffen wen die burg ze Grinowe vnd die ho^eue ze Tuggen vnd ze Wangen mit lúten vnd gůte, so wir dar zů verko^vffet haben, so súlen wir, die oder der ald dv´ vnser geswistergit vnd vnser erben, dú das vorgenant gůt ze Grinowe, ze Tuggen vnd ze Wangen mit dem, so da zů ho^ert, wider ko^vffen wellen denne ze male, swerren ein gelerten eit ze den heilgen offenlich grauen Fridrich von Toggenburg oder sinen erbon, ob er enwere, ob er ald sin erben des nicht enbern went, das wir dv´, die oder der, der oder dv´ ald die wider ko^vffen wellent, mit vnserm eigenlichen gůte die vorgenanden burg ze Grinowe vnd die ho^eue ze Tuggen vnd ze Wangen mit allem dem, so wir da zů verko^vft haben, wider ko^vffen, vns selber ze habenne an alle geuerde. Vnd ze einem offen vrkúnde alles des, so vorgeschriben stat, geben wir disen brief mit vnsern ingesigeln offenlich besigelt. Dis geschach vnd wart o^vch dirre brief geben ze Rapreswile¹, do man von gottes gebúrte zalte drútzehenhundert jar, dar nach in dem dritten vnd vierzigosten jare, an sant Thomas tag.

Source Fulltext: Chartularium Sangallense VI, Nr. 3870, S. 428.