Allen den, die disen brief an sehent, lesent oder ho^erent lesen, kúnt ich Eglolf der Blarrer von sant Gallen burger ze Costentz vnd vergich || offenlich an disem brief fúr mich vnd min erben, das ich den hof, den man nemmet Stro^elis hof, der Sturzenegges¹ waz vnd ze || Bichwille² gelegen ist nachwendig bi der kilchen, da ainhalb an stosset ain hof, dem man sprichet dez Kra^eiers hof, vnd anderthalb A^ebis||hof, vnd ain gůt, das gehaissen ist Ba^echi³, bi Bru^ewille⁴ gelegen, daz hern Eglolfs dez Omen⁵ waz, ze rehtem lehen han vnd min reht lehen sint von dem gotzhus ze sant Gallen vnd sú in nutzlicher gewer han, vnd daz ich dem conuent des klosters ze Maggenowe⁶ dú vorgenanten gu^eter lihen sol vnd lieh mit disem brief vnd hab gelihen iemerme fúr mich vnd . . min erben vmb ain sta^eten zins vmb ain hůn ja^erklich ze sant Gallen tult ze geben mir oder . . minen erben, ob ich enwa^er. Ich der vorgenant Eglolf vergich och fúr mich vnd fúr alle min erben, ob der vorgenand . . conuent ze Maggenowe mo^eht erwerben mit kainen dingen an dem vorgenanden gotzhus ze sant Gallen, daz dú aigenschaft der vorbenempten gu^eter iro werden mo^ehti, alder sú versetzzen oder verko^vfen weltin, daz ich oder min . . erben, ob ich enwa^er, sú dar an mit kainen dingen irren, sumen noch bekrenken sont, won sú dar an fúrderren, ob sú sin an v´ns begerant, ân alle geua^erde, als sú sin notdúrftig sint. Wa^er och, daz ez bescha^ehi, daz dú vorbenempten gu^eter vnd a^endrú gu^eter, dú der vorbenempt conuent von mir ze lehen het, in minr hant oder in miner erben hant, ob ich enwa^er, vngewa^erlich stant wurdint von todes wegen, wa sú denne sú ze ander erberen lúten handen fu^egen oder schaffan went oder mugen, daz sont wir inen wol gunnen vnd sú dar an nit ensumen. Wenne och das bescha^ehi, als da vor geschriben stat, so sont die vorgenanten conuent frowan dez vorgenanten zins gar vnd ga^entzlich ledig sin von mir vnd von . . minen erben, ob ich enwa^er. Wa^er och, daz der dikbenempt conuent kainú gu^eter me ko^vfti, dú in minen gewalt kamin oder in miner . . erben gewalt, dú sont in allem dem rehten stan als dú gu^eter, dú da vor benemmet sint. Vnd dar vmb, daz dis wâr vnd sta^et belib, vnd ze ainer merer sicherhait so henk ich der vorgenant Eglolf der Blarrer min insigel an disen brief. Der geben wart, do man zalt von gotz gebúrt drúzehundert jar, vierzig iâr, dar nach in dem vierden jâr, an der na^ehsten mitwochen nach sant Laurencientag.

Source Fulltext: Chartularium Sangallense VI, Nr. 3896, S. 442.