Wir der amman vnd die räte vnd die burger gemainlich der statt ze sant Gallen tůn kund vnd veriechent offenlich an disem brieff fúr v´ns vnd fúr alle vnser erben vnd nachkommen allen, die in ansehent, lesent oder hörent lesen, dz wir mit gůter vorbetrachtunng vnd beschaidenhait dem erwirdigen vnßerm gnädigen herren von gottes gnaden abbt Herman des gotzhuß ze sant Gallen¹ vnd v´nßren herren von dem cappittel desselben gotzhuses allen gemainlichen williklichen gelobt haben by dem aide, den wir v´nßerm vorgenanten herren abbt Herman vnd dem cappitel vnd dem gotzhuse zů sante Gallen gesworen haben, wa^er das vns dú burg ze Appenzelle² dehaineß jareß wurd ingeantwurtet von des gůtes wegen, das v´ns vsse gestünde an den fúnf vnd hundert marcken silbers, die v´ns vnser vorbenempter herr abbt Herman vnd das cappitel järlich geben son, vntz dz sy v´ns die sechshundert marck vnd drisseg marck silbers Kostentzer gewicht, die wir in verlihen haben, gantzlichen gewerant, als v´nser brieue sagant, die wir von in haben³, wenne wir denne des hoptgůtes vnd alles des schadens, den wir von des gůtes wegen vnd von der burg wegen gehept haben, von welher sache der vfgelôffen ist, vnd der kost vnd zerunge, die wir vffen der selben burg gehept haben, gewerat vnd gerichten werden, so so^elin wir v´nserm vorbenemten hern abbt Herman ald sinen nachkomen, ob er enwär, ald dem conuent gemainlich, ob kain abt ald pfleger da wäre, die selben burg wider inäntwürten a^vn allen fúrzug vnd a^vn alle widerrede, a^vn alle geuerde in allen den eran vnd in allen dem recht, als sú si ouch vor innehettan. Vnd wär, dz wir kain stösse ald mishelli mit in hettin von kainer hand sache wegen, dauor vns got behüt, so súlln wir in doch die burg wider inantwúrten âne fúrzug, als vor ist beschaiden, vnd von des stösses wegen nút vorhaben, das haben wir gelobt bi dem selben aide. Geschäch ouch, dz vns dú vorgenant burg wurd ingeantwurtet von ains núwen heren wegen ald abbteß, wenne sich der gegen v´ns gebindet der dinge, der sich vnser vorgenanter herre abbt Herman vnd der conuent gemainlichen ietzo gebunden hant von der sechshundert marck vnd drisseg marck silbers wegen, vnd v´ns ouch dz hoptgůt, das vns an den fúnff vnd hundert marcken vssegestanden ist, vnd den schaden allen, den wir von des hoptgůtes vnd der burg wegen gehept haben, von welher sache der vfgeloffen ist, vnd die kost vnd zerunge abgerichtet, die wir vffen der burg gehept haben, so su^elin wir in die burg wider inantwúrten a^vn alle widerred vnd allen fúrzug bi dem aide, an alle geuärde, als vor ist beschaiden, vnd sol v´ns dauor noch dawider núnt schirmen, ob wir kain ander stösse mit im hettin, dz got nit welle. Geschäch ouch, das ain núwer herr ald abbt kämme vnd sich der gegen vns der dinge nit bynden wölti, der sich vnser vorbenenter herr abbt Herman vnd der conuent ietzo gebunden hand, von des vorgeschribnen gůtes wegen, so súlin wir vnser heren von dem conuent alle gemainlich bi dem aide, den wir in vnd dem gotzhuse gesworen haben, vor im schirmen in der statt ze sant Gallen a^vn alle geuärde, des besten so wir múgen, vntz er sich der selben dinge gegen v´ns gebundet. Wir veriehent och, weli ietzo in vnsern räten sint ald hienach der ra^vte werdent, das die o^vch sweren son, iegkliche besunder ainen gelerten aid ze den hailigen, dú vorgeschriben^a) ding alle stät ze habenne vnd ze volfürenne an alle geuärd, dz sulin wir schaffen an alle geuerde bi dem aid, den wir gesworen haben. Wär ouch, dz wir kainen ra^vt hettin, vnder weli burger denne der merer tail vnser statt sweret, die sond sich der vorgeschriben dinge binden ze tünne mit dem aide, vnd súlin wir besorgen vnd schaffen a^vn alle geuärde, dz das gescha^ech, bi dem aide, den wir geschworen haben. Vnd zů ainem warem vrkúnde vnd ze ainer stäten sicherhait aller der vorgeschribner dinge vnd gedinge hencken wir vnser statt insigel an disen brieff, der geben ward in der selbun statt ze sant Gallen, do man zalte von Cristi gebúrt drúzehenhundert jar, viertzig jar, darnach in dem fúnften jar, an dem nächsten zinstag vor sant Johanns tag deß töffers.

Source Fulltext: Chartularium Sangallense VI, Nr. 3931, S. 477-478.