Wir Herman von gottes vnd des stůls genaden ze Ro^vm besta^eter abt des gotzhus ze sant Gallen¹ tůn kunt vnd veriehen offenlich an disem brief allen, die in ansehent || lesent oder ho^erent lesen, das fúr v´ns kament fúr geriht die êrsamen lút Otto, Cůnrat, Růdolf, Cůnratotto, Burkart, Walther, Cůnratku^echler, Wilhelm vnd Herman || von Ainwille² gebrůder, Agnes vnd Clara ir swesteren, vnd offenten da vor v´ns mit fúrsprechen vnd veriahen, das Hainrich der Esel von Zůtzwille³ burger ze Wile⁴, Ma^eht||hilt sin elichi wirtinn, Cůnrat, Burkart vnd Wilhelm ir elichen súne, Katherina, Ma^ehthilt, Margareta vnd Sa^eli ir elichen tohteran, die von v´ns vnd von v´nserm gotzhus ir lehen wârent, sich selber mit lib vnd mit gůt vnd o^vch das gůt halbes gelegen ze Zůtzwille, das man nemmet Hadmůtz gůt, mit allen rehten vnd mit aller zůgeho^erd an v´ns vnd an vnser gotzhus von inen reht vnd redlich geko^vffet hettin vmb zehen pfunt Pfenning gůter Costenzer múns, vnd wa^erin o^vch der gantzlich von inen gewert vnd an iren nutz bekert. Vnd baten v´ns an ainer vrtaile erfarn, wie sú sich der vorgenemten lút vnd gu^eter entzihen vnd in v´nser hand bringen so^eltin, als es kraft hetti vnd nu vnd hie nach sta^et vnd vnwandelber belib. Da fragten wir vorbenemter abt Herman vrtail vmbe, do ward ertailt mit gemainer vrtaild, sid die vorgenemten von Ainwille gebrůder alle vf disen húttigen tag, als dirre brief geben ist, mit ainandern tail vnd gemain hettin, vnd o^vch der vorgenemt Cůnrat der vorgenemten siner brůder Burkartz, Walthers, Cůnratku^echlers, Wilhelms vnd Hermans, die noch ze iren tagen nit komen sint, rehter vogt wa^er, das denn die vorgenemten Otto, Cůnrat, Růdolf, Cůnratotto, Burkart, Walther, Cůnratku^echler, Wilhelm vnd Herman gebrůder alle gemainlich mit ainandern v´ns vnd v´nserm gotzhus die vorgenemten lút vnd gu^eter an vnser hand vfga^ebin, vnd das die vorgenemten Agnês vnd Clara ir swestren ainen vogt mit der vorgenemten ir brůder willen na^emin vnd o^vch mit des selben vogtes hand die vorgenemten lút vnd gu^eter o^vch an vnser hand vfga^ebin. Do nament sú ze vogt mit der vorgenemten ir brůder willen vnd gunst den beschaiden man Růdolf von Stainach⁵, vnd gabent do die vorgenemten Otto, Cůnrat, Růdolf, Cůnratotto, Burkart, Walther, Cůnratku^echler, Wilhelm vnd Herman gebrůder vnd o^vch die vorgenemten Agnesa vnd Clara ir swesteren mit des vorgenemten Růdolfs von Stainach ir vogtz hand die vorgeschriben lút vnd gu^eter, als inen mit gemainer vrtaild ertailet was, ledklich mit allen rehten vnd mit aller zůgeho^erd vf an vnser hand, vnd enzigent sich o^vch da offenlich vor geriht fúr sú selb vnd fúr alle ir erben aller aigenschaft, aller lehenschaft, aller vorderung vnd aller ansprâch, so sú vnd ir erben zů den vorgenemten lúten vnd gu^etern von reht ald von gewonhait hatten ald iemer gewinnen mo^ehtin. Die vorgenemten Otto vnd Cůnrat von Ainwille gebrůder hand o^vch gesworn ietwedre besunder ainen gelerten ait ze den hailigen mit vfgehepter hand, des vorgeschribenn ko^vffes vnd der vorgenemten lút vnd gu^eter fúr sú vnd die vorgenemten ir brůder vnd swesteren vnd fúr alle ir erben wern ze sinne nach reht gen ma^englichem an gaistlichem vnd an weltlichem geriht, wâ es v´ns ald v´nsern nachkomen vnd v´nserm gotzhus notdurftig ist. Vnd ist dis alles beschehen vnd vollefu^ert mit aller ehafti wort vnd werk, so von reht vnd von gewonhait darzů hort vnd notdurftig was vnd als reht sitt vnd gewonlich was. Vnd ze ainem offenen waren vrkúnd vnd sta^eter sicherhait aller der vorgeschriben ding vnd geding henkin wir vorbenemter abt Herman v´nser insigel an disen brief. Wir die vorgenemten Otto, Cůnrat, Růdolf, Cůnratotto, Burkart, Walther, Cůnratku^echler, Wilhelm vnd Herman von Ainwille gebrůder, Agnês vnd Clara ir swesteren veriehin ain gantz warhait aller der ding, so von v´ns an disem brief geschriben stânt, vnd das alles das wâr ist, das v´nser gena^ediger her abt Herman da vorgenemt von v´ns veriehen hât an disem brief. Vnd ze merer sicherhait henken wir die vorgenemten Otto, Cůnrat, Růdolf, Cůnratotto, Burkart vnd Walther von Ainwille gebrůder vnd Agnês ir swester v´nserú insigel fúr v´ns vnd fúr die vorgenemten Cůnratku^echler, Wilhelmen vnd Herman v´nser brůder vnd fúr Claren v´nser swester an disen brief, won sú aigenr insigel nit hand. Ich der vorgenemt vogt Růdolf von Stainach vergich o^vch ain wârhait aller der vorgeschriben ding, vnd ze merer sicherhait henk ich o^vch min insigel an disen brief. Der geben ist in der stat ze sant Gallen, do man zalt von gottes gebúrt drúzehenhundert jar, vierzig jar vnd dar nach in dem ahtoden jar, an dem na^ehsten donstag nach sant Georien tag.

Source Fulltext: Chartularium Sangallense VII, Nr. 4079, S. 12-13.