Allen, die disen brief lesent ald ho^erent lesen, kúnden wir Adelhait¹ wilunt Růdolfs dez Giels elichú wirtenne von Helfen||berg², Berhtolt vnd V^olrich^a) ir sún³ vnd veriehint offenlich an disem brief, daz wir mit gesunthait libes mit gůter beschaiden||hait vnd vorbetrahtung dise nachgescriben lút, die v´nser aigen warent, Elizabetun Hainrichs dez Schmides elichun tohter || von Berg⁴ Růdolfs elichun wirtenne dez Schmides vo^b) Puppikon⁵, Berschin, Hainin vnd Adelhaidun irú kind vnd a^ellú dú kind, du si hie nach immer gewinnet, reht vnd redelich habint verkoffet vnd ze koffen gen dem gotzhus ze Vischinan⁶ sant Benedicten ordens in Costentzer bistům ze rehtem aigen vmb vier pfund pfenning allez gůter vnd gena^emer Costentzer múns, der wir alleklich vnd gar gewert sient vnd die wir in v´nsern schinba^ern redelichen nutz habint bewendet, vnd habint och dem vorgenanden gotzhus die vorgescriben lúte fúr aigen vf gen ledeklich, als reht site vnd gewonlich ist, vnd habint och gelobt mit v´nseren trúwan, daz wir vnd alle v´nser erben des koffes vnd der vorgescribenun lúte fúr aigen wer so^elint sin nach reht, wa sin daz gotzhus ze Vischinan ald an herre ald der conuent dez selben gotzhus bedurfent ald notdurftig sint vf gaistelichem ald vf weltelichem geriht, vnd entzihent v´ns mit disem vnd an disem brief aller rehte vorderung vnd ansprache, so wir ald v´nser erben an den ald zů den vorgescribenen lúten ald zů iro lib erbun ie hettunt ald gewnnent ald wir hie nach dar zů immer han ald gewinnen mugint ald mo^ehtint von reht ald von gewonhait ald ane reht ald dehainen weg. Vnd ze merer sicherhait aller vorgescribener ding, daz dú sta^et vnd war sient vnd belibent nu vnd hie nach von v´ns vnd von v´nseren erbun, so henken wir vorgenandú Adelhait wilunt Růdolfs dez Giels von Helfenberg elichú wirtenne vnd Berhtolt ir sun v´nserú insigel fúr v´ns vnd fúr alle v´nser erben an disen brief, vnd won ich V^olrich der Giel ir sun aigens insigels nit han, so binde ich mich an disem brief vnder Berhtoltz mines brůder insigel, a^ellú vorgescriben ding sta^et vnd war ze haben. Dis geschach vnd wart dirre brief geben an sant Gerdrud tag, do man zalte von gottes gebúrt drútzehenhundert jar, dar nach in dem ahtoden vnd vierzigosten jare.

Source Fulltext: Chartularium Sangallense VII, Nr. 4078, S. 11.