Wir Friderich graf von Toggenburch¹ chv´ndent vnd veriehent des offenlichen mit disem gegenwúrthigen brief, das der wolbeschaiden manne || Hainrich von Wildenrain² fúr v´ns kam gesund libes vnd můtes vnd gab v´ns v^ff an v´nser hant vrilichen vnd vnbetwungelichen den twing vnd ban hal||ben ze Cetzikon³, den berg ze Wildenrain mit huse, mit hof, mit hofraiti, mit wingarthen, mit holtz, mit velde, mit waide, mit brache, mit akker, mit || wisen, mit wasen, mit zwi, mit weg, mit steg, mit gebuwem vnd vngebuwem, mit wasser vnd mit wasserlaiti vnd sunderlichen vnd gemainlichen mit allen rechten, mit aller ehafti, mit allen nútzzen vnd gewonhaiten vnd ouch mit allen iren zůgeho^erden, die zů dem vorgenanthen twing vnd ban halben ze Cetzikon vnd ouch zů dem berg ze Wildenrain, huse, hof, hofraiti vnd wingarten ho^erent vnd geho^eren mugent, die er von v´ns ze lehen hatte, si sigent genempth oder vngenempth, gesůcht oder vngesůcht, als er si bis her gehaben vnd genossen hat. Vnd bat v´ns flizzeclichen, das wir das lehen vnd die lehenschaft an den vorgenanthen gu^ethern von im vffna^emint. Vnd won v´ns sin bett recht vnd redelichen dunchte, do nament wir das lehen vnd die lehenschaft an den vorgenanthen gu^ethern, der er sich in v´nser hant luterlichen vnd ga^entzlichen entzigen hât, vff an v´nser hant vnd nement si vff mit disem brief. Vnd beschah dis vffgeben vnd entzihen von im mit aller der gehúgde vnd gewarsami, Worten, werchen vnd geta^eten, die darzů hortent vnd geho^eren mochtent von recht vnd von gewonhaite des landes. Vnd ze ainem offen vrchúnde der warhait aller der dinge, die hie vorgeschriben vnd beschaiden sint, hant wir vorgenanther Friderich graf von Toggenburch v´nser aigen insigel an disen brief gehenket, der ouch ze ainem merern vrchúnde mit des vorgenanthen Hainriches von Wildenrain insigel besigelt ist. Dar nah vergih ich vorgenanther Hainrich von Wildenrain, das ich gesund libes vnd můtes den vorgenanthen twing vnd ban halben ze Cetzikon, den berg ze Wildenrain mit huse mit hof mit hofraiti mit dem wingarthen, mit allen iren rechten, ehafti, nútzzen vnd gewonhaiten vnd sunderlichen vnd gemainlichen mit allen iren zůgeho^erden, die ich von dem vorgenanthen minem herren dem edeln grafen Friderich von Toggenburch ze lehen hatte, als hie vor geschriben vnd beschaiden ist, dem selben minem herren grafen Friderichen von Toggenburch vrilichen vnd vmbetwungenlichen mit verdâchtem můthe vnd mit gůther gewissni vnd niemer widerzevordrent an sin hant, als ich si bis her gehaben vnd genossen hân, vff gab vnd vffgeben hân, vnd gib im si vff luterlichen vnd ga^entzlichen mit disem brief. Vnd han mich vnd alle min erben dar vmb mit wolbedachtem můt an des vorgenanthen mines herren grafen Frideriches von Toggenburch hant verzigen vnd verzihe mich vnd si mit disem brief aller ansprach, aller vorderung, aller fúrzúg vnd vzzúg, alles schirmes, aller geva^erde, alles gerichtes gaistliches vnd weltliches vnd sunderlichen des stůls von Ro^vm, da mit ich oder min . . erben nv oder her nâh wider die vorgenanthen gifte vnd das vffgeben oder das entzihen mo^echtint in thain wise oder wege komen, oder da mit ich oder si das vorgenanth lehen oder lehenschaft oder dú gu^ether mo^echtint wider in v´nsern gewalt vnd ze v´nsren handen bringen. Vnd ist dis v^ffgeben vnd entzîhen beschehen vnd vollefu^eret mit aller der gehúgde vnd gewarsami, worten, werchen vnd geta^eten, als vor ist beschaiden, die dar zů hortent vnd geho^erent mochten von recht oder von gewonhait des landes. Vnd ze ainem offen vrchúnde der warhait han ich vorgenanther Hainrich von Wildenrain min aigen insigel ouch an disen brief gehenket. Dis beschah vnd ward dirre brief geben ze Liechtenstaig⁴, do man von gottes gebúrte zalt drúzehenhundert jar, dar nah in dem a^echt vnd vierzigostem jar, an dem nehsten zinstag nah sant Bartholomeustag des zwelfbotten.

Source Fulltext: Chartularium Sangallense VII, Nr. 4097, S. 30-31.