Wir Friderich graf von Toggenburch chv´ndent vnd veriehent des offenlichen mit disem gegenwúrthigen brief, daz || wir mit gůther betrachtung gesund libes vnd můtes vnd ouch mit gůther gewissni luterlichen durch gotte vnd durch || die houchgelopthen magde v´nser lieben frowen sant Marien vnd ouch durch v´nser vnd v´nser vorder vnd durch aller gelovbiger || selen haile die aigenschaft des twinges vnd bannes halbes ze Cetzikon, des berges ze Wildenrain, des huses, des hofes, der hofraiti vnd des wingarten, die an dem selben^a) berge gelegen sint, die der wolbeschaiden man Hainrich von Wildenrain von v´ns ze lehen hatte vnd v´ns si recht vnd redelichen mit allen rechten, mit aller ehafti, mit allen nútzzen vnd gewonhaiten vnd ouch mit allen iren zůgeho^erden an v´nser hant vff geben hat vnd entzigen, als an dem brief beschaiden ist, der dar v´ber mit v´nserm vnd des selben Hainrichs von Wildenrain insigeln besigelt ist¹, den erberen gaistlichen mannen . . dem conmendúr vnd den . . brůdern gemainlichen des huses ze Tobel² sant Johans orden des hailgen spitals ze Jerusalem gelegen in Chostentzer bistum vnd ouch dem selben huse ze Tobel vrilichen vnd vmbetwungenlichen ze ainem rechten vrigen vnd ledigem aigen geben habent vnd geben inen die selben aigenschaft mit disem brief, vnd hant v´ns dar vmb an des erberen mannes hant brůder Růdolfs von Fridingen³ conmendúr des vorgenanthen huses ze Tobel luterlichen vnd ân alle geva^erde verzigen vnd verzihent v´ns vnd all v´nser erben mit disem brief aller ansprâch, aller vorderung, aller vzzúg vnd fúrzúg, aller briefen vnd vrihaiten, die wir von ba^epsten, von . . chaisern, von chv´ngen oder von thainen andren fúrsten habent oder noch mo^echtint gewinnen oder erwerben, vnd sunderlichen alles gaistliches vnd weltliches gerichtes, da mit wir oder v´nser erben die vorgenanthen gifte mo^echtint in thain wise oder wege nv oder her nâh mit recht oder mit gewalt vernichten, widertůn oder widerbringen. Vnd ze ainem offen vnd ewigen vrkúnde der warhait diser gifte vnd gâbe hant wir vorgenanther Friderich graf von Toggenburch v´nser aigen insigel gehenket an disen brief. Der geben ist ze Liechtenstaig, do man von gottes gebúrte zalt drúzehenhundert jar, dar nah in dem a^echt vnd vierzigostem jar, an der nehsten mittwochen nah sant Bartholomeus tag des zwelfbotten.

Source Fulltext: Chartularium Sangallense VII, Nr. 4098, S. 31.