Allen den, die disen brieff an sehent oder ho^erent lesen, kúnd ich her Eglolff der Ome¹ rytter vnnd vergich offennlich an disem brieff, dz ich recht vnnd redlich ain hof genempt ze Ba^echi², der an Bru^ewylle³ stosset, den erberen gaistlichen frowen der a^eptissinen vnnd dem conuent gemainlich ze Maggenowe⁴ ze kouffen geben han mit allen rechten nútzen vnnd gewonhaiten, so dar zů geho^ert, vmb XXXV lib.d. Costentzer, dero ich schon vnd erlich von inen gewert bin vnnd in minen schinbaren nutz bewenndet han, vnnd han den selben hof geuertigot zů Gerwiges des Bla^vrers hannden von dem gotzhuß ze sannt Gallen, dannen er min recht lehen^a) was, vnnd han den vorbenempten frowen der a^eptissinen vnnd dem conuent fúrbaß gelopt vnnd loben mit disem brieff fúr mich vnnd fúr min erben, des selben hoffes hinnan hin wer ze sin nach dem rechten, vnnd sol sy vmb den vorgenamten hoff versta^vn ald min erben, ob ich enwa^er, an gaischlichem vnd an weltlichem gericht, wo vnd wenne sy sin bedurffent, nach dem rechten. Vnnd hier vmb han ich inen ze merrer sicherhait vnuerschaidenlich ze búrgen geben Hainrichen von Eppennberg⁵, Johannsen von Luterberg⁶, ob ich sy nit verstu^enndi vmb den vorgenanten hoff, als da vor an disem brieff geschriben sta^vt, so sond mich die vorgenanten búrgen no^etten an lút an gůt mit gericht vnd a^vn gericht, je vncz ich den vorbenempten gaischlichen frowen volfu^er die ding, als ich da vor an disem brieff verjechen han, vnd wie die vorgenanten búrgen oder ir helffer des ze schaden kumpt, da loben ich sy von ze wisen on allen ir schaden, vnnd vmb ain besta^etung aller der vorgeschribnen dingen han ich min insigel gehengket an disen brieff. Wir die vorbenempten Hainrich von Eppennberg vnd Johanns von Luterberg vergehin, dz alle die ding, die der vorgenampt from ritter her Eglolff der Ome da vor^b) an disem brieff von v´nns verjechen hett, mit v´nnserm gůtten willen vnd gunst beschechen sind, vnd vmb ain merer sicherhait der vorgeschribnen dingen henngken wir v´nnsri insigel zů des vorgenanten hern Eglolffs insigel an disen brieff. Der geben ward, do von gotz gepurt wa^vren M°CCC° ja^vr vnd im XLVIII ja^vre, an dem na^echsten dunstag nach sant Margreten tag.

Source Fulltext: Chartularium Sangallense VII, Nr. 4094, S. 27-28.