Allen den, die disen brief an sehent, lesent oder ho^erent lesen, kúnt ich Cůrt der Kesseler von Zukenriet¹ vnd vergich offenlich an disem brief, das ich vmb alle die sto^esse, so ich mit minr || gna^ediger frowen swester Annun von Richenstain aptischennun vnd mit dem conuent gemainlich ze Maggenowe² gehebt han, lieplich v´berain komen bin vnd berihtet, mit so^elicher || beschaidenhait, das ich gelobt han mit gůten trúwan vnd lobon an disem vnd mit disem brief vnd gesworn han zů den hailgen, daz ich den wolbeschaidnen minen frowan vor||benemptan . . der abtischennun vnd . . den conuent gemainlich ze Maggenowe weder lib noch gůt enpfro^emden sol noch kainen weg wider sú niemer getůn ân geua^ert, vnd wa oder wenne ich das v´bergiengi, so bin ich den vorgen(antan) minen frowan . . der abtischennen, dem conuent gemainlich ze Maggenowe, Hainrichen von Eppenberg³ vnd Růdolf dem Aster schuldig vnd vellig worden fúnfzig phunt gůter Costenzer phenning. Hier vmb ze merer sicherhait han ich miner vorgenanten frowen der abtischennen, dem conuent ze Maggenowe, Hainrichen von Eppenberg vnd Růdolfen dem Aster vnuerschaidenlich ze búrgen geben dis nahgescriben erbern lút, hern Albreht lútpriester ze Amptozelle⁴, Wilnhelmen den Hofakrer, Johansen den Keller von Herisowe⁵, V^elin den Kesseler min brůder, Peter den Hůber von Helfetswille⁶, Cu^enin den Spehten von Sta^eggliswille⁷, Hansen den Juden, Rv^odolfen den Aher, Cu^enin den Karrer, Hainin den Widmer von Zukenriet, Bůchholtzen, Bertholten den Núkomen, Bertholten den Okner von Zukenriet, Cůraten den Okner, Hansen den Hůber von Zukenriet vnd Cůnzen von Altstetten⁸. Die hant alle gemainlich vnd vnuerschaidenlich denen vorgenanten . . der abtischennen, . . dem conuent gemainlich ze Maggenowe, Hainrichen von Eppenberg vnd Růdolfen dem Aster gelobt vnd gesworn zů den hailgon, wa oder wenne ich die vorgenanten gelúbt bra^ech oder v´berfu^er vnd nach dem v´beruarn sú der vorgenanten phenning, der ich inen schuldig worden wa^er, nit enwerti, so sont sú die vorgenanten búrgen no^eten ze hûs ze hof an ligendem vnd an varndem gůt, wa vnd wie sú sú geno^eten mugent, vffen dem land vnd in den stetten, mit reht ald ân reht, ie vntz das sú der vorgenanten fúnfzig phunt Costenzer phenning gewert werdent, vnd sol sú da vor nút schirmen weder gaistlichs noch weltlichs geriht. Ich han och gelobt mit gůten trúwan vnd gesworn ze den hailgon den vorgenanten búrgen gemainlich, wie sú der vorgenanten burgschaft ze schaden kont, das ich sú da lo^esen sol von allem schaden, vnd wa ich des nit enta^et, so hant sú vollen gewalt, mich ze no^eten an lip an gůt varndem vnd ligendem, wie vnd wa sú mich geno^eten mugent vff dem land vnd in den stetten mit reht vnd ân reht, ie vntz das inen ir schad von mir ab gelait wirt, vnd han mich enzigen vnd enzih mich mit disem brief aller der rehten, da mit ich mich geschirmen mo^eht an gaistlichem vnd an weltlichem geriht. Wa^er och, das der búrgen kaine ab gieng von todús wegen oder vnnútz wurdi, so sol ich den vorgenanten . . minr frowen der abtischennen, dem conuent ze Maggenowe, Hainr. von Eppenberg vnd Růdolfen dem Aster ain andern búrgen als gůten vnd als gewússen gen, als der wa^er, der da vnnútz worden ist, inrunt den na^ehsten aht tagen, so ich von inen ermant wirt, an geua^ert, vnd wa ich des nit enta^et, so sint inen dú vorgenanten fúnfzig phunt geuallen vnd hant och denne vollen gewalt, die vorgenanten búrgen vmb dú vorgenanten fúnfzig phunt ze no^eten in allem dem rehten, als da vor gescriben stat. Wie och die dikbenempten . . dú abtischenne, . . der conuent ze Maggen(owe), Hainr. von Eppenberg vnd Růdolf der Aster ald ir helfer von der vorgenanten phandung wegen ze schaden kont, da sont ich vnd die búrgen sú von wîsen vnd gantzlich vnschadhaft machen. Vnd won ich aigens insigels nit enhan, so verbint ich mich aller der ding, so ich da vor an disem brief veriehen han, vnder des frumen ritters insigel hern Amers von Luterberg⁹, den ich gebetten han, das er sin insigel vmb ain besta^etung der vorgeschriben ding vnd vergiht henk an disen brief. Wir die vorgenanten búrgen veriehin alle gemainlich vnd offenlich an disem brief ainr warhait aller der ding, so der vorgenant Cu^eni der Kesseler von Zukenriet da vor an disem brief von v´ns veriehen het. Vnd won wir aigenr insigel nit enhabin, so verbinden wir v´ns gemainlich mit dem vorgenanten Cu^enin dem Kesseler vnder des vorbenempten frumen ritters hern Amurs insigel von Luterberg, den wir ez gebetten hant ze henken vmb ain offen v´rkúnt aller vorgescribenen dingen an disen brief. Ich der vorgenant herr Amur von Luterberg ritter vergich, das ich von bet wegen des dikbenempten Cu^enis des Kesselers von Zukenriet vnd von der vorbenempten búrgen bet wegen, won sú aigenr insigel nit enhant, min insigel vmb ain mer sicherhait vnd vmb ain besta^etung aller vorgescribenen dingen gehenket han an disen brief. Der geben wart ze Maggenowe, do von gotz gebúrt waren drúzehenhundert jar, vierzig iâr, dar nach in dem ahtoden iar, an dem na^ehsten ma^entag vor sant Margarethun tag.

Source Fulltext: Chartularium Sangallense VII, Nr. 4093, S. 26-27.