In^a) gottes namen amen. Wir Herman von gottes vnd des stůls genâden ze Rôm bestater abt des gotzhus ze sant || Gallen¹ kúnden vnd veriehen offenlich an disem brief fúr v´ns vnd fúr alle v´nser nachkomen allen, die in ansehent lesent || oder ho^erent lesen, das wir ansehent vnd angesehen habent grôsse vnd sta^ete trúwe vnd dankna^em dienst, die v´ns vnd || v´nserm gotzhus der beschaiden man Johans Schlihting von sant Gallen vnd fro Engela sin elichi wirtinne willeklich tůnt vnd getân hânt vnd noch tůn mugunt. Dauon lihen wir vnd geben in vnd den nachgeschribnen iren kinden Johansen, Beringern, Margarethen vnd Annen vnd allen den kinden, dú von dem vorgenemten Johansen Schlihting vnd fro Englen siner elichen wirtinnen vnd von den vorgenemten kinden iemer geborn werdent, tohtran vnd sún, friges burgerreht in vnser stat ze sant Gallen vnd davor, wâ das ist. Vnd haben inen das gelihen lûterlich willeklich vnd frilich mit aller frihâit, mit aller gewonhait, mit allen vnd vollen rehten, so darzů notdurftig ist vnd als es mit den selben worten beschlossen ist vnd beuangen, also das sú das selb friges burgerreht von v´nser gâb, die wir in daran tu^egen vnd getân haben, volleklich haben sond von v´ns vnd von allen v´nseren nachkomen, wâ sú denn seshaft sint, in allem dem reht vnd in aller gewonhait, als es ander lút vnd burger in vnser stat ze sant Gallen ald dauor hânt vnd als vntz her vngeuârlich behalten ist. Wir haben o^vch gelobt dem selben Johansen Schlihting vnd fro Englen siner elichen wirtinnen vnd den vorgenemten kinden, das wir noch kain v´nser nachkomen sú noch irú kint, dú von in iemer geborn werdent, an dem selben burgerreht niht irren súllent mit dekainen dingen, wir súllen sú an ir leben vnd an ir tode daran mit allen dingen behalten. Vnd darumb das dis alle^b) wâr sie vnd sta^et vnd vnwandelber belibe, so henken wir vnser insigel an disen brief. Der geben ist ze sant Gallen in der stat in dem jar, do man zalt von gottes gebúrt drúzehenhundert jâr, vierzig jâr vnd darnach in dem núnden jâr, an dem na^ehsten fritag nach mitter vasten, da ze gegen wârent dis ersamen lút Geori von Wildenstain², Johans von Wolhusen³, closterherren v´nsers vorbenemten gotzhus, her Eglolf von Roschach⁴ ritter, Cůnrat von Griffenstain⁵ frige, Eglolf von Altstetten⁶, Johans Wildrich, Růdolf von Staina⁷, Walther vnd Johans sin sún vnd ander erber lút vil.

Source Fulltext: Chartularium Sangallense VII, Nr. 4113, S. 42.