Allen, die disen gegenwúrtigen brief ansehent alder ho^erent lesen, kv´nden wir Gerwig der Blarrer burger ze sant Gallen vnd baide || sin brůder Egelolf vnd Albreht burger ze Costentz vnd vergehin des offenlich an disem brief, das wir gesvnt libes vnd můtes willeclich || vnd mit gůter vorbetrahtvnge mit Jacoben Ramv^nges v´nsers salmans burger ze Costentz willen vnd gvnst vnd mit siner hant luter||lich durh got vnd durh vnsers vatters sa^eligen vnd v´nser vnd aller v´nser vorder selen willen vnd den ze hail vnd ze trost dem pfleger vnd dem maister des spitales des hailigen gaistes ze Costentz an dem Merkstade¹ vnd an den selben spitale reht vnd redelich geben haben die aigenschaft des huses vnd der hofstat, dv´ ze Costentz vndern sv´ln zwischen Hugen Stro^elins hus vnd dem hus, das man nemmet das Merwunder, gelegen sint. Vnd geben die selben aigenschaft des selben hus vnd hofstat an den selben spitale mit disem brief ze rehtem aigen mit allen den rehten, als wir si hatten. Vnd haben och dem selben spitale die vorgenanten aigenschaft mit des vorgenanten v´nser salmans willen vnd gvnst vnd mit siner hant gefertigot vnd vffgen mit allen den worten, werken vnd geta^eten, so darzů hôrt ald geho^eren môht nach reht vnd nach gewonhait der stat ze Costentz. Vnd haben v´ns och mit v´nsers salmans willen vnd gvnst vnd mit siner hant gen dem egenanten spitale entzigen vnd entzihen v´ns mit disem brief fúr v´ns vnd alle v´nser erben vnd nachkomen alles des rehtes vnd aller der ansprach, so wir an der vorgenanten aigenschaft hatten ald von dekainen dingen gehaben mo^ehten. Vnd des ze warem vnd offeme vrkv´nd vnd sta^eter sicherhait aller dirre vorgeschriben dinge geben wir die vorgenanten Gerwig, Egelolf vnd Albreht die Blarrer gebrůder v´nserv´ insigel an disen brief. Darnach vergih^a) der vorgenant Jacob Ramvng der salman, das dis alles mit minem gůten willen vnd gvnst vnd mit miner hant beschehen vnd vollefu^ert ist âne alle geuerde, als vor ist beschaiden. Vnd des zainer warhait hab ich och min insigel gehenkt an disen brief. Der ist ze Costentz geben, do man von Cristes gebúrte zalte drv´zehenhvndert jar, darnach in dem nv´n vnd vierzigosten jar, an sant Gerdrut tag.

Source Fulltext: Chartularium Sangallense VII, Nr. 4112, S. 41.