Wir graue Albreht von Werdenberg der elter vnd graue Albreht der junger¹ sin sun verie||hen vnd tůn kunt allen den, die disen brief sehent lesent oder ho^erent lesen, won Růdolf || der Maier von Alstetten² vnser diener vns als nútz dankna^em vnd als gůt dienst tůt ge||tân hat vnd noch getůn mag vnd das wir in des billich mit vnserm schirm vnd vnser hilf ergetzzen súllent, darumbe won wir das erkennent, so haben wir den egenemten Růdolf den Maier vnd alles sin gůt in vnsern schirm genomen, das wir im gelopt habent mit vnser trúw an aides stat, das wir in an dem maier ampt ze Alstetten vnd an allem sinem gůte vnd an allen den rechten vnd gewonhaiten, so an in von sinem vatter selgen geuallen sint vnd er biz her gehept vnd genossen hat, vnd och an der kilchen ze Lustenow³ vnd an dem gelt, so dar zů geho^ert, getrúwlich vnd nutzlich schirmen sont gen menlichem ân alle geua^erde, vnd súllent in an dem selben sinem gůte vnd an dem maier ampt ze Alstetten noch an den rechten vnd gewonhaiten, so er biz her gehept vnd genossen hat, vnd an der kilchen vnd an der kilchen gelt ze Lustenow, die wîl sie in sines sunez hant stat, niht bekúmberren noch bekrenken noch dar an schaden tůn in dekainen weg ân alle geua^erde, vnd haben im darumbe ze merer sicherhait vnd ze ainem waren vrkúnde der vorgeschriben gelúpte vnserú insigel gehenkt an disen brief. Der geben wart ze Rinegge⁴ an dem na^ehsten donstag vor sant Matheus tag des zwelfbotten in dem jar, do man zalt von gottes gebúrt drúzehen hundert jar, vierzig jar vnd darnach in dem núnden jar.

Source Fulltext: Chartularium Sangallense VII, Nr. 4138, S. 64.