Allen den, die disen brieff ansehent lesent oder ho^erent lesen, kúnd ich herr Frantz der Ru^edlinger besta^eter lútpriester ze Wile¹ vnd vergihe offennlich an disem brieff, dz ich mit gůtem ra^vt beschaidenhait vnd vorbetrachtung vnd ouch mit Hainrichs des Ru^edlingers mines brůders vnd rechten vogtes willen ra^vt vnd hand ab minen huß vnd hofstatt gelegen ze Wile in der statt vor sant Niclouß kilchen² an der ringmur vnd an Lo^enbergs³ hus recht vnd redlich geben vnd gesetzet han durch miner sele willen ja^erlich ainen mutt kernen geltes gůtes vnd gena^emes Wiler messes gen Maggenow⁴ dem conuent gemainlich an dem tische mit der beschaidenhait vnd bedingde, dz ich hinnanhin vnd alle min erben vnd nachkomen, wer denne dz obgenante huß inne hett, den vorgeschribnen mut kernen ja^erklich dem vorgenanten closter gen vnd richten sol ane fúrzug ze sant Gallen tag ald dar nach inrunt den na^echsten acht tagen ane geua^erde, vnd sol der conuent des selben closters den mutt kernen ja^erlich an vnnser frowen a^vbenndt ze den a^emde^a) gen vmb vische an dz ma^vl dem conuent gemainlich, vnd sond ouch vff den selben tag ja^erlich hinnanhin min ja^vrzitt bega^vn immer me ane alle geua^erd mit singen mit lesen vnd mit betten, als sitte vnd gewonlich ist. Wa^er ouch, dz ich ald min erben inen den vorgeschriben mutt kernen geltes nun ze dem na^echsten sant Gallen tag vnd dannethin ja^erlich ze sant Gallen tag nit ga^ebint noch richtint, als vor ist geschriben, so hand sy gewalt dz huß ze besetzenn vmb ainen zinß vnd den mutt kernen von dem zinß vor ab ze nemen ane alle wider rede min vnd miner erben. Vnnd ze merer sicherhait aller vorgeschribner ding gib ich inen disen brieff besigelten mit minem vnd mines vorgenanten brůders vnd rechten vogtes insigel dar an gehenngckt. Ich Hainrich der alt Ru^edlinger vogt ze Frowenfeld⁵ vergich ouch offennlich an disem brieff, dz herr Frantze der Ru^edlinger besta^etter lútpriester ze Wile min brůder die vorgeschriben ding alle mit minem willen gunst ra^vt vnd hand gesetzet geta^vn vnd volfu^ert hett, vnnd sol ich noch enkain min erben dz obgenante closter noch den conuent dar an niemer sumen noch irren noch bekrencken mit worten noch mit werchen mit gericht noch ane recht noch dehainen weg. Vnd ze merer sicherhait aller vorgeschribner ding hengk ich min insigel fúr mich vnd fúr min erben an disen brieff. Der geben ist an sant Regen^b) tag, do von gottes gepurt wa^vrent M°CCC° ja^vr, dar nach in dem XLVIIII ja^vre.

Source Fulltext: Chartularium Sangallense VII, Nr. 4139, S. 65.