Allen den, die disen brief an sehent oder ho^erent lesen, kúnd ich her Amer von Luterberg ritter vnd vergihe des offenlich an disem brief || fúr mich vnd alle min erben, daz ich gesund libes vnd och můtes mit bedahtem^a) vnd mit gůter vorbetrahtung luterlich durch || got vnd durch v´nser ffrowen êr vnd durch aller hailgon êr vnd durch miner vnd miner wirtennen sailgen vnd miner vorderen vnd^b) || durch aller dero selan hails willen, so ich ie geschadgot alder ie v´ber nossen hab, geben han vnd gib mit disem brief fúr mich vnd alle min erben den erwirdigen frowen . . der a^ebtischenn vnd dem . . conuent gemainlich des closters ze Magnow ze ir gotzhus wegen drie juhart reban an dem Immenberg, die zWingarten^c) gelegen sint vnd min lehen von . . Tockenburg^d) warent, vnd gib den egeschribenen frowan die obgeschribenn dri juhart reban fúr mich vnd alle min erben mit wasser mit wasserlaitti mit steg mit weg mit vongang mit zů gang, also daz die dikgenanten frowan des obgeschribenn closters ze Maggnow enkaines rehten warten noh sprechen sont zů dem gůtlin, daz an dem Immenberg gelegen ist, daz ich vnd min sun Jacob¹ fro Eisbeten des Ammans vnd iren kinden ze ainem rehten lehen gelúhen hant, als sú des v´nsern offenn brief hant, vnd des ze merer sicherhait diser gift so verzihe vnd entzihe ich mich fúr mich vnd alle min^e) erben alles des rehten, so ich oder min erben an die obgeschribenn drie juhart reban hatten oder gehaben mohtend in kaines weges. Ich verzih vnd entzihe och mich fúr mich vnd alle min erben alles des rehten vnd ansprach, so ich oder min erben iemer an die dikgenanten drie juhart reban gehan oder gewinnen mo^ehtind an gaischlichem oder an weltlichem geriht alder in kaines wegs, vnd aller gesetz vnd gewonhait, da mit ich oder min erben wider die obgeschribenn gift iemer v´t getůn oder gewurken mo^ehtind, das den obgeschribenen frowen des dikgenanten closters ze Maggnow schad gesin mo^eht in kaines wegs. Won sol och wissen, das ffro Elsbet des Ammans vnd irú kint den obgeschribenn frowan des dikgenanten closters ze Maggnow durch got des gunnen hant, daz sú ja^erliches iren win, der inan an den obgenanten drin juharten reban wirt, druken vnd dorgelan sont in iro torglen, die sú mit anderm den^f) vorgenanten gůt von mir vnd minem sun Jacoben ze rehtem lehen hant, vnd sond die vorgenanten frowen des dikgenanten closters ze Maggnow den obgenanten fro Elsbeten des Ammans vnd iren kin^g) noh iren erben no nieman von iro wegen enkainen torgelwin oder trotwin geben. Vnd ist dis alles beschehen vnd follfu^ert mit v´nserm gůtem willen vnd gunst vnd mit v´nseren handen. Vnd ze warem vnd offem vrkúnd diser gift vnd ding so henk ich der obgenant her Âmer von Luterberg min aigen insigel offenlich an disen brief fúr mich vnd alle min erben. Dar nah vergihe ich der obgenant Jacob von Luterberg her Amers sun von Luterberg, daz disú obgeschribenú ding a^ellú war sint vnd das sú min vatter getan vnd follfu^ert hat mit minem gůten willen vnd gunst, vnd daz ich noh min erben da wider niemer getu^egint in kaines weges^h), so henk ich der obgenant Jacob von Luterberg min aigen insigel och an disen briefⁱ⁾ zů mins vatters herr Amers von Luterberg insigel an disen briefⁱ⁾. Der ze Lútispvrg geben wart in der burg, do man zalt von gottes geburt drúzehenhundert jar vnd dar nah in dem fúnfzgosten jar an dem zinstag nah sant Stefans tag.

Source Fulltext: Chartularium Sangallense VII, Nr. 4156, S. 80-81.