Wir graf Ffriderich von Tockenburg¹ tůnt kunt allen den, die disen brief an sehent oder ho^erent le||sen, daz fúr v´ns kam herr Amer von Luterberg² ritter vnd bat v´ns, daz wir luterlich durch got vnd durch || siner bet willen v´ns entzigent vnd vf ga^ebint die aigenschaft, so wir hatten an drin juharten reban an dem || Immenberg, die zWingarten^a)3 gelegen sint, vnd sú den erwirdigen frowan an der . . a^ebtischen vnd dem conuent gemainlich des closters ze Maggnow⁴ ga^ebint, do erhortend wir sin bette, won es v´ns redlich dunhte, vnd nament die obgenanten drie juhart reban vf an v´nser^b) von dem obgenanten herr Amer von Lúterberg, die er von v´ns etwenne^c) ze lehen gehebt hatte, vnd entzigent v´ns vnd gabent vf die egenanten drie juhart reban fúr v´ns vnd alle v´nser erben luterlich durh got vnd durh v´nser frowen êr vnd durh aller^d) hailgen êr vnd durh v´nserr vnd v´nserr vorderen selan hails willen vnd durh des obgeschribenn herr Amers von Luterberg bet willen den êrwirdigen frowan der . . abtischenn vnd dem conuent gemainlich des closters ze Maggnow die aigenschaft der obgeschribenn drie juhart reban vnd gebent inan sú mit disem brief fúr v´ns vnd alle v´nser erben mit steg mit weg mit wasser mit wasserlaitti mit vongang mit zůgang sunderlich vnd gemainlich mit allen den rehten nútzen vnd gewonhaitten, so dar zů hort ald geho^eren solt von reht oder gewonhait, sú sient genempt oder vngemept. Vnd ze merer sicherhait diser gift so verzihent vnd entzihent wir v´ns fúr v´ns vnd alle v´nser erben gegen den obgeschribenen frowan der abtischenn vnd dem conuent gemainlich des closters ze Magnowe vnd iren nahkomen alles des rehten, so wir hatten oder gehaben mohtend an den vorgeschribenen drin juharten reban. Wir verzihent vnd entzihent v´ns och fúr v´ns vnd alle v´nser erben alles des rehten vnd ansprach, so wir oder v´nser erben iemer gehan oder gewinnen mohtind an gaischlichem oder an weltlichem geriht, vnd aller gesetzten^e) vnd gewonhait der kayser vnd des landes, da mit wir oder v´nser erben die obgeschribenn frowan gesummen oder geierren oder inan schad gesin mo^ehtind in kaines weges an den obgeschribenen drin juharten reban. Vnd des ze warem vnd offem vrkúnd diser gift so henkent wir der obgenant graf Ffriderich von Tockenburg v´nser aigen insigel offenlich an disen brief. Dar nah vergihe ich der obgenant herr Amer von Luterberg ritter, daz dis alles war ist vnd daz ich alles das getan vnd follfu^ert han, daz der edel min gna^ediger^f) herr . . von Tockenburg von mir an disem brief geschriben hat^g). Vnd des ze warem vnd offem vrkúnd diser ding vnd getat so henk ich der obgenant herr Amer von Luterberg min aigen insigel offen zů des obgenanten mins herren . . von Tockenburg insigel an disen brief, der ze Lutispurg⁵ in der burg geben wart in dem jar, do man zalt von gottes geburt drúzehenhundert jar vnd dar nah in dem fúnftzgosten jar an dem nehsten mentag nah sant Stefans tag.

Source Fulltext: Chartularium Sangallense VII, Nr. 4155, S. 78-79.