Allen den, die disen brief ansehent, lesent oder ho^erent lesen, tůn ich Cůnrat der Schenk von || Landegge¹ ritter kunt vnd vergich offenlich an disem brief fúr mich vnd fúr alle min erben, || das ich dem ersamen wolbeschaiden manne Gerwig dem Blarrer burger ze sant Gallen || das gůt ze Búrwalt², das min lehen was von dem gotzhûs ze sant Gallen, mit allen rehten, nútzzen vnd gewonhaiten, die darzů vnd darin geho^erent, reht vnd redlich ze ko^vffen geben hab vmb drissig pfunt vnd vmb vier pfunt pfenning gůter Costenzer múns, der ich gar vnd gantzlich von im gewert bin, vnd hab im das selb gůt ze Búrwalt geuertgot mit des êrwirdigen mines gena^edigen herren von gottes gnâden abt Hermans des gotzhûs ze sant^a) Gallen³ hant gůtem willen gunst vnd verhengde, als reht sitte vnd gewonlich ist. Vnd hab o^vch gelobt mit gůten trúwen fúr mich vnd fúr alle min erben, des vorgenemten Gerwigs des Blarrers vnd siner erben des vorgeschriben gůtes ze Búrwalt reht wer ze sinne nach reht gen ma^englichem an gaistlichem vnd an weltlichem geriht vnd ân geriht, wa vnd wie es inen notdurftig ist. Vnd ist das alles beschehen vnd vollefu^ert mit allen den worten vnd werken, so von reht vnd von gewonhait darzů gehorten vnd notdurftig wârent. Vnd ze ainem waren vrkúnd vnd ze ainer sta^eter sicherhait aller der vorgeschriben ding vnd geding henk ich Cůnrat der Schenk von Landegge da vorgenemt ritter min insigel an disen brief. Ich Cůnrat der Schenk⁴ kilchherre ze Hedwangen⁵ vergich offenlich an disem brief, das alles, das der vorgenemt herr Cůnrat der Schenk min vatter da vor an disem brief veriehen hât, mit minem gůtem willen, gunst vnd verhengd beschehen ist vnd vollefu^ert. Vnd ze merer sicherhait der selben ding hab ich o^vch min insigel gehenkt an disen brief. Der geben ist in der stat ze sant Gallen, in dem jâr, do man zalt von gottes gebúrt drúzehenhundert jâr, vierzig jâr vnd darnach in dem núnden jâr, an dem na^ehsten donstag vor sant Othmars tag.

Source Fulltext: Chartularium Sangallense VII, Nr. 4152, S. 76-77.