Ich Albrecht von Bussenang frije lantrichter in Thurgo^vy¹ tůn kunt vnd vergihe offenlich an disem brief, daz fúr mich || kamen ze der Lo^vbun² an dem lantag des na^echsten dornstags vor mitter vastun die erbern lúte Elizabethe vnd Mechthilt || geswistergid Berchtolts Iburgers seligen kint von Swartzenbach³ mit ir vettern Johans dem Iburger von Swarzenbach ir || rechten vrbornen vogte ainunt vnd Růdolf der Aster gewisser botte der closter fro^vwen vnd des gotshus ze Maggno^vwe⁴ andrunt, vnd veriahent da offenlich die vorgenanten Elizabethe vnd Mechthilt des Iburgers tochteran mit ir vogte vnd mit fúrsprechen als recht ist, daz sú der eptischenne vnd gemainlich dem conuente des vorgenanten closters ze Maggno^vwe recht vnd redlich vnd ane alle geuerde fúr ledig aigen ze ko^vffenne geben hant daz gůt ze Swartzenbach gelegen, daz man nemmet Magelspergerre gůt⁵, giltet ia^erlichs ze zinse sechs stuk vnd stosset dar an der Iburgerre gůt, der fro^vwen gůt von Zofingen von Costentz⁶, des Richen gůt von Swartzenbach, vnd stosset o^vch dar an sant Martis gůt des gotzhus ze Jonswille⁷ vnd daz gůt, daz man nemmet der Núkomen gůt, daz o^vch der closterfro^vwan von Maggno^vwe ist, vnd habent die vorgenanten Elizabethe vnd Mechthiht^a) die Iburgerinen . . der eptischen vnd gemainlich dem conuente des vorgenanten gotshus ze Maggno^vwe daz vorgesprochen gůt ze ko^vffenne geben mit wisan mit ackern mit holtz mit velde mit wasmen mit zwijen mit wunne vnd mit waide vnd mit aller zůgeho^erde vmb zwainzig phunt vnd vmb nún phunt phenning Costentzer múntze genger vnd ga^eber, der sú nach ir vergicht von der eptischenne vnd dem conuente des vorgenanten gotshus gar vnd gantzlich gewert sint vnd in ir elichen nutz verkeret hant, vnd stůnden o^vch die vorgenanten Elizabethe vnd Mechthilt des Iburgers tohtran dar fúr gerichte an den stab mit dem vorgnanten ir vogte vnd entzigen sich recht vnd redlich frilich vnd vnbetwungenlich mit ir vogtes hand gunst vnd gůtem willen als recht ist des vorgeschriben gůtes vnd alles des rechten, so sú darzů hatten oder gehaben mo^vchten, mit gelerten worten, als gerichte vnd vrtailde gab, an Růdolfs Asters hand ze der eptischen vnd ze des conuentes wegen gemainlich des vorgedachten gotshus ze Maggno^vwe vnd lopten o^vch des selben gůtes wer ze sinne fúr ledig aigen nach rechte, wo des dú eptischen vnd der conuente des closters ze Maggno^vwe notdúrftig sint an gaistlichen vnd an weltlichen gerichten, si verzigen sich o^vch aller helfe gaistlichs vnd weltlichs gerichtes, da mit sú oder ir erben daz vorgnante gotshus an dem selben gůte in kainen weg iemer bekrenken oder beswa^erren mo^echten. Es wart o^vch ertaillet mit gesamnoter vrtailde, daz dú vertigunge ze des vorgnanten gotshus handen beschehen were als reht ist als volkomenlich, daz es nu vnd hernach kraft vnd hantuesti haben solti. Vnd des ze ainem offen vrkúnde der warhait so ist nach rechter vrtailde dirre brief versigelt mit des lantgerichtes insigel in Thurgo^vy. Der brief wart geben ze der Lo^vbun an dem vorgesaiten lantag, do man zalte von Cristus gebúrte drúzehenhundert jar, dar nach in dem fúnfzigosten jare.

Source Fulltext: Chartularium Sangallense VII, Nr. 4165, S. 88-89.