Allen den, die disen brief an sehent lesent oder ho^erent lesen, kúnd ich herr Albreht von Bussenang ain fryer herr in Costent||zer bistům lantrihter in Turgo^e1 vnd vergih offenlich an disem brief fúr mich vnd fúr alle min erben, daz ich mit gůter vor||betrahtung vnd beschaidenhait vnd mit gesunthait libes vnd můtes Elizabethun die Vorsterrun, wilunt Cůnrates dez Vorsters || tohter von Rossrúti², Růdolfes La^endis burger ze Wil³ elichun wirtenn, dú min aigen waz von dem lîb, luterlich durh got vnd durh miner sele hail willen reht vnd redelich vnd och ledklich geben han vnd gib si och vff mit disem brief ze rehtem aigen dem gotzhus ze Vischinan⁴ sant Benedicten ordens in Costentzer bistům, vnd entzihe mich mit disem brief fúr mich vnd fúr alle min erben vnd nâchkomen aller der reht, vordrung, ansprâch vnd aigenschaft, so wir an der ald zů der obgenandun Elizabethun ie hettunt ald gewnnent von reht ald von gewonhait ald wir zů ir ald zů Margarêtun ir tohter, die si sid mâls bi Růdolf La^endin ir elichem man, sid daz ich si dem gotzhus ze Vischinan v^ff gab, gewnnen het, ald wir zů dehainen kinden, dú dú selb Elizabeth hie nâch bi Růdolf La^endin gewinnet, iemer han ald gewinnen mugint ald mo^ehtint vff gaistlichem ald vff weltlichem geriht ald ân reht. Vnd ze merer sicherhait aller vorgeschribener ding, daz dú sta^et vnd wâr sient vnd belibint nu vnd hie nâch von mir vnd von minen erbun vnd nâchkomen, so henk ich vorgenander Albreht von Bussenang min insigel an disen brief. Dis geschach vnd ward dirre brief geben an dem na^ehsten ma^entag nach v´nser vrown tag ze der liehtmiss, do von gottes gebúrt wârent drúzehenhundert jar, dar nach in dem fúnfzigosten jâre.

Source Fulltext: Chartularium Sangallense VII, Nr. 4162, S. 86-87.