Wir V^olrich von gottes gnaden bischoff ze Costentz¹ tu^egen kunt vnd ze wissend allen den, die disen || brief ansehend lesend alder ho^erend lesen, daz fúr v´ns kamend ze Costentz in dem houe v´nser wonung || die erbern lúte Johans von Scho^enenberch² vnd frô Vrsull³ sin elichú husfrôwe, vnd versatz da || vor v´ns der ietzbenemt Johans von Scho^enenberch mit v´nser hand willen vnd gvnst der vorgenanten vrô Vrsullen siner elichen husfrowen disú nach geschribenn sinv´ gu^eter, dú allú von v´ns von v´nserm gotzhus ze Costentz lehen sint, die burg vnd die hofraiti ze Scho^enenberch, den houe gelegen in dem dorf ze Durstorf⁴, den houe ze Albreswille⁵, Růdolfen von Albriswille, der den selben houe ze Albriswille buwot, vnd allú sinv´ kint vnd ouch des selben Růdol. elichen wirtinne fúr hundert march gůts vnd lo^etiges silbers Costentzer gewihtes, mit so^elichem geding, daz der vorgenant Johans von Scho^enenberch alder sinv´ kint, dú er ietz hât vnd die im gott verlihen mag bi der vorgedahten vrô Vrsullen siner elichen husfrowen, gewalt haben sond, die vorgenemten burg vnd ouch die gu^eter ze lo^esenn mit hundert marchen gůts vnd lo^etiges silbers Costentzer gewihtes, wenn si wellend alder mugend. Wa^ere aber, daz dú vorgenemt vrô Vrsulla den vorgenanten Johans von Scho^enenberch iren wirt v´berlepti vnd daz denn nit liberben da wa^erind, die von in zwain komen wa^erind, so sol vnd mag dú vorgedaht vrô Vrsull die egenanten burg vnd die hofraiti ze Scho^enenberch vnd ouch dú egedahten gu^eter haben vnd niessen vnd dú vorgeschribenn lúte vnd dú selben gu^eter mit ir fu^eren, war si wil, vnd ist ouch dis also vor v´ns vnd mit v´nser hant willen vnd gunst beschehen vnd vollefu^ert mit allen den worten vnd werchen, die von reht vnd ouch von gewonhait darzů gehortend vnd wie es kraft hat vnd haben mag. Vnd des ze wa^vrem vnd vnlogenba^erem vrkúnd henken wir v´nser insigel an disen brief. Der ist ze Costentz geben des jars, do man von gottes gebúrt zalt drúzehenhundert vnd fúnfzig jare, an dem na^ehsten fritag nach sant Angnesen tag.

Source Fulltext: Chartularium Sangallense VII, Nr. 4160, S. 84.