Wir Herman von gottes vnd des stůls gnâden ze Rôme besta^eter abt¹ des gotzhûs ze sant Gallen || tu^en kunt vnd veriehen offenlich an disem brieue allen, die in ansehent, lesent oder ho^erent lesen, das || fúr v´ns kam der êrber wolbeschaiden Gerwig der Paiger burger ze sant Gallen vnd brůder Johans || Blarrer, den man nemmet Sta^ehelli, maister in der brůder spitâl ze sant Gallen², vnd bat v´ns der vorgenemt Gerwig der Paiger, das wir den zehenden ze Hopzermos³, der aller ja^erlich giltet drithalb viertail kernen⁴ sant Galler messes vnd zwo vasnaht hennen, der sin lehen was von v´nserm vorbenemten gotzhus, den er den vorgenemten brůdern in dem spitâl ze ko^vffen geben hetti vmb drú pfunt pfenning gůter Costenzer múns fúnf schilling minder, die er von inen darumb enphangen hetti, mit allen vnd vollen rehten, die er an dem selben zehenden hetti, von im v^f na^ement vnd in lihen vnd vertgatin dem vorgenemten brůder Johansen an der brůder in dem spitâl gemainlich vnd an des huses stat, als reht sitte vnd gewonlich wa^er. Do erhorten wir sin bet vnd nament den selben zehenden mit allen rehten von im v^f an vnser hant vnd vertgaten in dem vorgenemten brůder Johansen an der brůder gemainlich vnd des hûses des spitâls stat in allem reht vnd in aller gewonhait, als die vorgenemten brůder vnd der spitâl a^endrú gu^eter vnd zehenden vntz her hânt inne gehebt vnd o^vch noch hant. Vnd ist dis alles beschehen vnd vollefu^ert mit allen den worten vnd werken, so darzů gehorten ald ho^eren solten vnd notdurftig wârent von reht vnd von gewonhait. Vnd ze ainem waren vrkúnde vnd ze ainer sta^eter sicherhait aller der vorgeschribenen dinge henken wir vnser insigel an disen brieue, an den o^vch der vorgenemt Gerwig sin insigel gehenkt hât. Ich Gerwig der Paiger da vorgenemt vergich ain gantz wârhait aller der vorgeschribenen dinge vnd das alles das wâr ist, das min gna^ediger herre von gottes gnâden da vorgenemt abt Herman des gotzhus ze sant Gallen von mir an disem brief veriehen hât. Ich hab mich o^vch entzigen vnd entzih mich mit disem brieue aller aigenschaft, aller lehenschaft, alles rehten vnd aller ansprâch, die ich vnd min erben an dem vorgeschriben zehenden ze Hopzermos hatten ald iemer gewinnen mo^ehtin. Ich hab o^vch gelobt mit gůten trúwen fúr mich vnd min erben, des vorgeschriben zehenden ze Hopzermos reht wer ze sinne nach reht gen ma^englichem an gaistlichem vnd an weltlichem geriht vnd an allen stetten, wâ sin die vorgeschriben brůder vnd das hûs des spitâls bedurfent vnd notdurftig sint. Vnd ze merer sicherhait der selben dinge henk ich o^vch min insigel an disen brieue. Der geben ist in der stat ze sant Gallen, an dem na^ehsten samstag nach sant Katherinun tag, do man zalt von gottes gebúrt drúzehenhundert jâr vnd darnach in dem fúnfzigosten jare.

Source Fulltext: Chartularium Sangallense VII, Nr. 4191, S. 107-108.