Allen den, die disen brief ansehent lesent oder ho^erent lesen, tůn ich Eglolf von Rosenberg¹ ritter kunt vnd vergich offenlich an disem brieue fúr mich vnd fúr alle min erben vnd nachkomen, das ich mit gůter vorbetrahtung vnd beschaidenhait willeklich vnd frilich dem êrwirdigen minem gena^edigen herren von gottes genâden abt Herman des gotzhus ze sant Gallen² vnd dem gotzhus ze sant Gallen zwelf pfunt pfenning Costentzer múns ia^erliches geltes von des vorgenemten gotzhus sunderlútan stúran vnd zinsen, die min gewert pfand warent von dem vorgenemten minem herren vnd von dem gotzhus fúr sechszig march silbers, gantzlich vnd gar ledig gelassen han vnd ledig lan mit disem brief durch got vnd durch miner sel hailes willen, vnd won der vorgenemt min herre abt Herman vnd alle min herren von dem conuent gemainlichen mir die genâd vnd die gu^etlichi willeklich getân hant, das sú mir den zehenden ze Gaissow³, der dem vorgenemten gotzhus ledig worden ist von Katherinen sa^eligen der Gasserinen von Flums⁴ wilent Eberhartz sa^eligen des Ammans von Rinegge⁵ êlichen wirtinnen mit allen rehten nútzen vnd gewonhaiten, die darzů vnd darin geho^erent, zů ainem rehten lipding geben hand vnd sú och mir vnd Annun Johansen sa^eligen des Entziswillers von sant Gallen êlichen tohter zwelf pfunt pfenning ia^erliches geltes von ir sunderlútan stúran vnd zinsen ze ainem rehten lipding geben hant mit der geding, weders vnder v´ns zwain stirbet, das dann das ander dú vorgeschriben zwelf pfunt geltes aller ia^erlich innemen vnd niessen sol, alle die wil es lebt, in lipdings reht vnd ze ainem rehten lipding. Darumb vergich ich, das min erben nach minem tode zů dem vorgeschriben zehenden ze Gaissow noch zů den zwelf pfunden geltes, dú hie vorgenemt sint, noch zů dem vorgenemten gotzhus ze sant Gallen von des zehenden wegen noch von der zwelf pfunt geltes wegen noch von der sechszig march wegen an hain reht noch ansprach niemer han noch gewinnen sond von dehainer slacht sach wegen an gaistlichem noch an weltlichem geriht noch ân geriht. Vnd deß ze ainem offenem waren vrku^end vnd sta^eter sicherhait aller der vorgeschriben ding vnd geding, so von mir an disem brief geschriben stant, henk ich der vorgenemt Eglolf von Rosenberg ritter fu^er mich vnd fu^er alle min erben vnd nâchkomen min insigel an disen brief. Der geben ist an der na^ehsten mitwochen nacht^a) sant Gregorien tag, do man zalt von gottes gebu^ert dru^ezehenhundert jar, fu^enfzig jar vnd darnach in dem ersten jare.

Source Fulltext: Chartularium Sangallense VII, Nr. 4206, S. 119-120.