Allen den, die disen brief ansehent oder ho^erent lesen, kúnden wir Andres der Hoppler schulthais¹, Johs. der Zoller, Johs. von Sala, Egbrecht Na^egelli, Eberhart der Hoppler, Hainrich || der Hirte, Stephan Gru^ening vnd Hainrich der Spengler der rat ze Winterthur² vnd vergehen offenlich an disem brief vmb die sto^ezze vnd missehelli, so der erber herre || abt Hainrich des gotshus ze Rútti³ des ordens von Premonstrey v´nser burger vnd Johs. von Luterberg⁴, den man nemmet Phulwe, mit ainander hatten, da || Johs. von Luterberg den egenanten v´nsern herren den abt ansprach, er hetti gůt inne vnd were im gůt worden von vro Elzbethen seligen von Eppenstain⁵, darzů er recht hetti von siner elicher husfro^vwen wegen der von Múnchwille⁶ tochter, dú ir erb were, vnd o^vch rechtes sprach zů der alpe gelegen in Turtal⁷, dú man nemmet an Ja^efelun⁸, daz dú sin lehen were. Da wider aber v´nser herre der abt sprach, dú selb alpe were sin vnd sines gotshus aigen vnd hetti o^vch dekain gůt inne von der von Eppenstain wegen, da von er im oder siner wirtinnen gelten oder wider geben so^elti. Der selben sto^esse si ze baiden siten vf v´ns kamen vnd lopten o^vch bi gůten trúwen in aides wise sta^ette zehabenne, wes wir v´ns dar vmb erkandin oder sú dar vmb hiessin. Vnd nach baider taile rede vnd widerrede so haben wir sú lieplich vnd gu^etlich ze den minnen mit baider taile wissende mit ainander berihtet vnd haissen sú genainander gůt frúnde sin, also daz der obgenante v´nser herre der abt dem egnanten Johans von Luterberg geben vnd gewert hat vierzig guldin vnd fúnf guldin gůter Florener mit voller gewicht fúr alle ansprach vnd fúr alles daz reht, so er zů im oder zů dem gotshus ze Rútti hatte von der vorgenanten alpe oder von der von Eppenstain seligen wegen, vnd súlnt o^vch lieplich vnd gu^etlich mit ainander berichtet sin aller der sto^esse, so sú mit ainander gehebt hant vntz vf disen húttigen tag, vnd sol v´nser herre der abt vnd sin gotshus von der ansprach wegen, als vorbeschaiden ist, von Johans von Luterberg vnd sinen erben ledig vnd los sin vnd nu vnd hernach vnbekúmbert beliben ane alle geuerde. Vnd des ze ainem waren vrkúnde vnd daz dis richtunge sta^ette belibe, so haben wir disen brief geben besigelten mit v´nsers rates insigel ze Wintertur. Ich der vorgenante Johans von Luterberg vergihe o^vch an disem brief, daz ich mit dem obgenanten minem herren dem abte von Rútti lieplich vnd gu^etlich vmb alle sto^esse, so wir mit ainander vf disen húttigen tag gehebt hant, berichtet bin vnd sunderlich vmb dú vorgeschriben alpe vnd vmb die ansprach, so ich von minen oder miner elicher husfro^vwen wegen zů im hatte von der von Eppenstain seligen wegen. Vnd hab vmb die richtunge von im emphangen vnd bin gewert vierzig guldin vnd fúnf guldin gůter Florener mit voller gewicht vnd hab o^vch gelobt, dis richtunge sta^ette zehabenne, als vorbeschaiden ist, vnd da wider nicht zekomenne noch zetůnne in kain wise, vnd verzihe mich o^vch fúr mich vnd min erben aller vordrunge vnd ansprach, da mit wir in oder daz vorgenante sin gotshus an der vorgeschriben alpe oder von der von Eppenstain seligen gůtes wegen mit gaistlichen oder weltlichen gerihten oder ane gerichte oder mit kainen Sachen iemer bekrenken oder beswa^eren mo^echtin. Vnd des ze ainem offen vrkúnd^a) der warhait vnd meren sicherhait so hab ich o^vch min aigen insigel gehenket an disen brief. Der geben wart ze Wintertur an dem na^echsten mentag nach dem sunnentag, do man sang Reminiscere, do man zalte von gots gebúrte drúzehenhundert vnd fúnfzig jar, dar nach in dem ersten jare.

Source Fulltext: Chartularium Sangallense VII, Nr. 4205, S. 118-119.