Allen, die disen gegenwúrtigen brief ansehent alder ho^erent lesen, kv´nden wir Růdolf kylcherre ze Roschach¹ vnd Růdolf kylcherre ze Herisôwe² gebrůder von Roschach, hern Egelolfes || sa^eligen von Roschach³ ains ritters sv´n, vnd vergehin des offenlich an disem brief, daz wir baide willeclich vnd mit gůter vorbetrahtvnge nach v´nser gůter frv´nde vnd ander erber lúte rate || dem beschaiden man Hainrichen von Hermenstorf⁴ vnd sinen erben haben ze koffent geben ains rehten redelichen êwigen koffes dise lúte vnd gu^eter, dv´ hie nach geschriben stant, || daz ist dv´ vogtaye ze dem Langenrikkenbach⁵ ze der kylchen, dv´ selbe vogtye lehen ist von dem gotzhus vnd dem bischoffe ze Costentz, vnd dis nachgeschriben lúte, daz ist Haini Brv^nnenmaister, Haintzeli Hentschůher vnd sin wip vnd zwai kint, Hans O^emeli, Katherin dv´ Gillerin, A^elli Wirtz vnd ir tohter vnd vier kint, V^elins Pfawen wirtinne vnd drv´ kint, V^elins Beltz wirtinne vnd vier kint, Hans der Torman vnd sin wirtinne vnd zwai kint, V^eli Torman vnd sin wirtinne vnd drv´ kint, Ru^edi ze dem Hof, dis vorgeschriben lúte sint och a^ellv´ lehen von Costentz. So sint dis nachgeschoben lúte aigen, Haintzeli der Keller vnd sin wip, Cv^onrat der Keller Haintzelins brůder sin wip vnd drv´ kint, V^eli Halwigs ist selb vierde geswistergit vnd sin můter, Wa^eltins Halwigs kint ain knab vnd ain tohter, Schinenbergerin vnd ir svn, der Schaller ob Walde⁶, dv´ Gillerin des Bu^echelers wip ir tohter vnd ir kint, dv´ wirtinne ob langen Egge⁷, ir brůders wip vnd zwai kint, Herman Otte sin wip vnd zwai kint, des selben Hermans můter vnd siner geswistergid drv´, A^elli Scho^ettin, Ânne ir swester vnd irv´ kint zwai, Werlins wirtinne von Wilâ⁸ vnd ir kint vierv´, Hans Krapf vnd sin brůder Cu^eni vnd des wirtinne vnd zwai kint, Hans Cv^onrattlins von Totnach⁹ vnd der Saltzman, der da ze Merspurg¹⁰ gesessen ist, Bertschins von Wila vier kint, dv´ A^eptinne von Hugeltzhouen¹¹, Haini Aptz svn, Peters Gillers wirtinne vnd vier kint, Cv^ontz in Aichen¹² vnd sin můme A^elli, A^elli dv´ Kellerin von Hugeltzhouen, Ma^etzi Kellerin ir swester, der Pfister von Merstetten¹³ sin wip vnd sin tohter vnd Haini Mv´ngi vnd zwo siner tohteran, vnd a^ellv´ dv´ kint, dv´ die obgenanten lúte bi ainander hant, si sigin benent ald vmbenent, ald die noch von inen koment vnd geborn werdent. Darzů haben wir im ze koffen geben alle die aigenschaft vnd lehenschaft, dv´ wir haben an den gu^etern, die dv´ vorgenanten lúte ald iro dekaines svnderlich da her von v´ns ze lehen gehebt hant, wa dv´ gelegen sint ald wie dv´ genant sint, si sigin aigen ald lehen, vnd mit namen a^ellv´ dv´ reht, dv´ wir an der vorgenanten vogtye vnd an den selben lúten vnd an allen iren gu^etern hattent, vnd swaz darzů ho^ert, ez sie mit wasen, mit zwi, mit waide, mit holtz, mit velde, mit a^ekkern, mit wisen, mit twingen, mit ba^ennen, mit aller ehafti, mit allen nutzen vnd gewonhaiten vnd mit allen rehten, gesůchs vnd vngesůchs, benent ald vnbenent, wissendes ald vnwissendes, als dv´ selbe vogtye ze dem Langenrikkenbach vnd die selben obgenanten lúte vnd gu^eter an vns komen vnd braht sint vnd als wir si gehebt, besessen vnd genossen haben von gewonhait ald von reht her vntz an disen hv´ttigen tag, also haben och wir im vnd sinen erben die selben vogtye vnd lúte vnd gu^eter mit aller ir zů geho^erde ze koffent geben vnd geben inen si mit disem gegenwúrtigen brief vmb hvndert pfvnt vnd vmb ainlúf pfvnt pfenninge alles gůter vnd genemer Costentzer mv´ns, vnd sigin och der gar von im gewert vnd sint in v´nsern redelichen nûtz komen vnd bekert, als wir vergehin mit disem brief. Vnd haben im och die selben vogtye ze dem Langenrikkenbach vnd och die lúte, die lehen sint von Costentz, von dem erwirdigen vnserm gna^edigen herren bischoff V^olrichen von Costentz¹⁴ vnd mit siner hant mit vffgende gefertigot vnd haben och die obgenanten lúte, die aigen sint, vff offener des riches strasse gefertigot vnd vffgeben vnd haben in gesetzêt vnd setzen in mit disem brief in nûtzlich gewer der vorgenanten vogtye vnd aller der lúte vnd gu^eter, dv´ da vorgeschriben stant, vnd haben das alles gen im getân vnd vollefu^ert mit allen den worten, werken vnd geta^eten, so zů so^elichem fertigen vnd vffgeben hôrt vnd notdúrftig was nach gewonhait vnd nach reht. Vnd haben v´ns darvber verzigen vnd verzihen v´ns baide willeclich mit disem brief fúr v´ns vnd fúr alle v´nser erben vnd nachkomen gen dem vorgenanten Hainrichen von Hermenstorf vnd gen allen sinen erben vnd nachkomen an der obgenanten vogtye ze dem Langen Rikkenbach vnd an den selben obgenanten lúten allen vnd an ir lip vnd an allen ir gu^etern vnd svnderlich an den gu^etern, die dv´ selben lúte von v´ns da her ze lehen gehebt hant, vnd swaz darzů ho^ert, ze vrta^et aller aigenschaft aller lehenschaft aller vordervnge aller ansprach alles schirmes alles vszugs aller hilf vnd alles rehtes gaischelichs vnd weltlichs gerihtes, da mit wir ald ieman von v´nseren wegen die selben vogtye vnd die obgenanten lúte ald gu^eter gar ald an aîme tail kv´ndin ald mo^ehtin angesprechen ald da mit dirre redelich vngeuârlich koff kv´nd ald mo^eht in kain wîse gewendet ald gebrôchen werden. Vnd wa^er, das die selben vogtye ald lúte ald gu^eter gar ald an aime tail nv^ ald hernach iêman anspra^ech fúr aigen ald fúr lehen ald mit kainer ander ansprach, des so^elin wir vnd vnser erben in vnd sin erben verstân vnd versprechen vnd des ir reht wern sin nach reht âne geuerde. Vnd ze warem vnd offeme vrkv´nde vnd sta^eter sicherhait aller dirre vorgeschriben dinge geben wir die selben Růdolf der elter vnd Růdolf der jvnger gebrůder von Roschach fúr v´ns vnd alle v´nser erben vnd nachkomen dem selben Hainrich von Hermenstorf vnd sinen erben vnd nachkomen darv´ber disen brief mit v´nseren aigenen insigeln besigelten. Dis beschach vnd ist dirre brief ze Costentz geben, do man von Cristes gebúrte zalte drv´zehenhvndert jar, darnach in dem ain vnd ffvnfzigosten jar, an des^a) hailigen crútzes abende in ain mayen, als es fvnden.

Source Fulltext: Chartularium Sangallense VII, Nr. 4215, S. 126-128.