Allen, die disen brief ansehent alder ho^erent lesen, kúnde ich Yemmer von Búrgelon¹ hern || Eberhartes sa^eligen svn von Búrgelon² ains ffryen herren vnd vergihe dez offenlich an di||sem brief, daz der ffrome ritter her Bernhart der Schenk von Landegge fúr mich kam || vnd offenot vnd sprach also, daz er den erwirdigen gaischelichen vrowen der a^ebtissinne vnd dem conuente gemainlich dez gotzhus ze Maggenowe ze koffent geben hab die wise ze Tâtenwille, die er von mir da her ze lehen gehebt hat, vnd bat mich die selben wise von im vfnemen an min hant, also daz ich durch sin bette a^ellv´ dv´ reht, dv´ ich ald kain min erbe vnd nachkomen dar an da her gehebt haben, vfga^ebe der vorgenanten a^ebtissinne vnd dem conuente gemainlich dez gotzhus ze Maggenowe, dar vmb hab ich sin bette erho^ert vnd hab mit mins rehten vogtes willen vnd gunst hern V^olrichs von der Alten Clingen³ vnd mit siner hant a^ellv´ dv´ reht, dv´ ich ald kain min erbe vnd nachkomen an der selben wise ze Tatenwille da her gehebt haben ald her nach gehan mo^ehtin an aigenschaft an lehenschaft ald an kainen anderen dingen, der selben a^ebtissinne vnd dem conuente gemainlich dez selben gotzhus ze Maggenowe vnd dem selben ir gotzhus mit gůtem willen vnbetwungenlich mit worten mit geta^eten vnd mit aller kraft, so darzv^o hort vnd notdúrftig waz, ffrilichen vffgeben vnd in iro hant offenlich vnd êweclich enzigen inen vnd ir gotzhus ane alle geuerde, vnd verzihe mich an disem brief fúr mich vnd alle min erben an der selben wise aller aigenschaft aller lehenschaft aller vorderunge aller ansprach alls schirms alls vszugs vnd aller hilf gaischelichs vnd weltlichs gerihts vnd alls vnsers rehten, vnd wa^er daz die selben wise ieman anspra^eche fúr aigen ald fúr lehen ald mit kainer ander ansprach, dez so^elin wir si vnd ir gotzhus verstan vnd versprechen vnd dez ir reht wern sin gen ma^engelich nach reht ane geuerde, dar nach vergihe ich der vorgenante V^olrich von der Alten Clingen ainer gantzer warhait alles dez, so hie an disem brief ist beschaiden, vnd ist och alls mit minem gůten willen vnd gunst vnd mit miner hantgetat beschehen vnd vollefu^ert. Vnd des ze vrkúnde der warhait geben wir ich V^olrich von der Alten Clingen vnd Yemmer von Búrgelon vnserv´ insigel an disen brief. Der ist ze Costentz geben, do man von Cristes gebúrt zalte drúzehenhundert jar, dar nach in dem zwai vnd fúnfzegosten jar, an sant Siluesters abende.

Source Fulltext: Chartularium Sangallense VII, Nr. 4239, S. 147-148.