Wir graf Albreht von Werdenberg der elter¹ tůnt kunt allen den, die disen brief an sehent || oder ho^erent lesen, daz v´nser o^ehan graf Ffriderich von Tockenburg² vnd V^olrich Stephan^a), V^olrich Brantho, || Eberhart vnd Johans von Sax³ gebrůder alle vier gemainlich vmb alle die sto^ess misshellung clag vnd || ansprach, so der obgenant v´nser o^ehan graf Ffriderich von Tockenburg vnd die obgenanten von Sax mit en an ander^b) hattond oder gehebt hant vntz vf disen húttigen tag, als dirr brief geben ist, vf v´ns giengen vnd kament. Do sprachent wir vs, daz alle ansprachen, die sú vf den tag hatten, ab werint vnd v´nser obgenanter o^ehan von Tockenburg vnd sin erben vnd sin lút vnd der erben beliben sont bi den gu^etern vnd rehten, so die obgenanten von Sax an sú anspra^echig hattond, dú hienah geschriben stant. Des ersten sol der obgenant v´nser o^ehan von Tockenburg vnd sin erben beliben vnd bestan bi der alp, die man nempt Sennu^el⁴. Er vnd sin erben sond och beliben bi allen den rehten vnd gewonhaitten, so er vntz her in der alp Tesel⁵, dú also genant ist, gehebt hat, won sol och wissen, daz des obgenanten vnsers o^ehanss lút vnd der erben beliben sont bi allen den gu^etern vnd rehten, so zů den gu^etern ho^eret, dú sú ko^vft hant von den von Sax oder von iren lúten. Es sol och Hainrich Wisshobt minem obgenanten o^ehan von Tockenburg vnd sinen erben beliben mit lib vnd mit gůt vnd mit aller zů geho^erd. Es ist och beret, ist daz, daz Arnolt der Weber hinder minen o^ehan von Tockenburg zúhet, so sol der selb Arnolt sin vnd siner erbo sin mit allem sinem farenden gůt. Es ist och beret, daz Hermans sailgen von Scho^enenbodmen⁶ erben vnd der erben beliben sont bi der wis vnd gu^etern, dú Zu^elbach⁷ gelegen ist bi Ganss⁸, dú Hermans sailgen von Scho^enenbodmen warent, vnd sont du han vnd niessen als ander ir aigen gůt, vnd sont die obgenanten V^olrich von Sax, den man nempt Stephan, V^olrich Brantho, Eberhart vnd Johans von Sax gebrůder noh iro erben den obgenanten v´nsern o^ehan von Tockenburg vnd sin erben vnd sin lút noh ir erben an den obgenanten stuken ainem noh kainem sunderlich noh gemainlich niemer gesummen noh geierren an gaischlichem noh an weltlichem geriht noh in kaines wegs. Vnd des ze warem vnd offem vrkúnd aller diser ding so henkent wir der obgenant graf Albreht von Werdenberg v´nser aigen insigel offenlich an disen brief. Dar nah vergehent wir die obgenanten V^olrich Stephan, V^olrich Brantho^c), Eberhart vnd Johans von Sax gebrůder fúr v´ns vnd alle v´nser erben, daz dis alles war ist vnd daz wir alles daz getan vnd ffollfu^ert hant, daz von v´ns an disem brief geschriben stat. Vnd des ze warem vnd offem vrkúnd, daz dis alles war ist, so henkent wir die obgenanten V^olrich Stephan, V^olrich Brantho v´nser´ aigen insigel offenlich an disen brief, vnder dú selben insigel wir Eberhart vnd Johans von Sax v´ns^d) bindent, es alles stait ze habenn, von^e) wir aigener insigel nút habent. Dis beschach vnd wart dirr brief ze Werdenberg⁹ geben, do man zalt von gottes geburt drúzehenhundert jar vnd dar nah in dem zwaivndfúnftzgosten jar, an sant Ferenun tag.

Source Fulltext: Chartularium Sangallense VII, Nr. 4257, S. 160-161.