Stephanus miseratione divina tituli sanctorum Johannis et Pauli presbyter cardinalis¹ discreto viro . . vicario in spiritualibus || ecclesie Constanciensis sede pastore vacante² salutem in domino. Ex parte universitatis seu oppidanorum oppidi sancti || Galli Constanciensis diocesis nobis oblata petitio continebat, quod ipsi oppidani, prout tibi exponent, quendam || presbyterum³ ceperunt ipsumque captivum detinerunt^a), qui alias illesus restitutus fuit pristine libertati, propter quod excommunicationis incurrerunt sententiam in tales generaliter promulgatam. Super quibus supplicari fecerunt humiliter dicti oppidani eis per sedem apostolicam de oportuno remedio misericorditer provideri. Nos igitur auctoritate domini pape, cuius penitentiarie curam gerimus, discretioni tue committimus, quatinus si^b) est, postquam passo iniuriam, si non satisfecerunt, satisfecerint competenter, ipsos oppidanos a dicta sententia et peccatis suis aliis, que tibi confitebuntur, nisi talia sint, propter que merita^c) sit sedes consulenda predicta, absolvas hac vice in forma ecclesie consueta et iniungas inde eorum cuilibet pro modo culpe penitentiam salutarem et alia, que eis de iure fuerint iniungenda, proviso attente, quod principaliores, qui fuerunt facti seu captionis huiusmodi, sedem personaliter infra decem menses proxim(e) venturos a data presentium visitent memoratam, alioquin in eandem sententiam ipso iure noverint se relapsos. Dat. Auinione non. ianuarii, pontificatus domini Clementis pape VI anno decimo^d).

Source Fulltext: Chartularium Sangallense VII, Nr. 4242, S. 149-150.