Allen den, die disen brief ansehent, lesent oder ho^erent lesen, kúnd ich Cůnrat der Waibel V^olrichs sa^elgen des Waibels von Huntwille¹ elicher sun vnd || vergich offenlich an disem brieue fúr mich vnd fúr alle min erben, daz ich verko^vft hab vnd ze ko^vffenn geben hab reht vnd redlich dem êrwirdigen || minem gna^edigen herren abt Herman abt des gotzhûs ze sant Gallen² die alppe, die man nemmet Swaigalppe³, die mir ze minem tail worden ist || von den gu^etern, die der vorgenemt min vatter sa^elig gelâssen hât, mit allen rehten, nútzzen vnd gewonhaiten vnd mit allem dem, so darzů vnd darin geho^ert von reht oder von gewonhait, vmb núnzehen^a) phunt phenning gůter vnd genger Costenzer múnse, der ich gantzlich vnd gar von im gewert bin vnd an minen gůten nutz bekêrt. Die selben alppe hab ich im mit allen rehten vnd mit aller zůgeho^erde an sin hant v^f geben vnd geuertgot, als reht sitte vnd gewonlich ist. Ich hab o^vch dem vorbenemten minem herren abt Herman gelobt mit gůten trúwen fúr mich vnd fúr alle min erben, der vorgeschribenen alpp vnd des vorgeschribenen ko^vffes reht wer ze sinne nâch reht gen ma^englichem an gaistlichem vnd an weltlichem geriht vnd an allen stetten, wâ er sin bedarf vnd nôtdurftig ist. Ich hab mich o^vch willeklich entzigen vnd entzih mich mit disem brieue aller der reht, vordrung vnd ansprach, so ich vnd min erben, ob ich enwa^er, zů der vorgeschribenen alpp hatten ald hie nâch iemer gewinnen mo^ehtint. Vnd ze ainem wâren vrkúnde vnd ze ainer sta^eten sicherhait aller der vorgeschribenen dinge so han ich vorbenemter Cůnrat der Waibel fúr mich vnd fúr alle min erben min insigel gehenkt an disen brief. Darnâch vergich ich Johans von Meldegge⁴ amman ze Huntwille offenlich an disem brieue, daz für mich kament, do ich ze Huntwille offenlich ze geriht saz, V^olrich, Růdolf vnd Johans des vorgenemten Cůnratz des Waibels brůder, Engeldrut, Katherina, Anna vnd Agnêsa ir swestren vnd nament ze fúrsprechen Bartholome den Blarrer burger ze sant Gallen, der offent an ir stat vnd von ir wegen offenlich vor geriht, sú wo^eltint sich a^ellú gemainlich willeklich entzihen gantzlich vnd gar aller der reht, so sú an der vorgeschribenen Swaigalpp hattent ald hie nâch iemer gewinnen mo^ehtint, die selb alpp Cůnrat irem brůder da vorgenemt ze sinem tail worden wa^er, vnd bat mich eruarn an ainer vrtail, wie sú daz tůn so^eltint vnd mo^ehtint, als es nu vnd o^vch hie nâch kraft hetti, das tet ich vnd ward ertailt mit gemainer vrtail, daz die vorbenemten knaben vnd tohtren, die vogtba^er wa^erint, na^emint ainen vogt vnd daz dann mit iren vnd mit ir vogtes handen tůn so^eltint. Do nament sú ze vogt Walther den Waibel in dem Bodem⁵, vnd entzigent sich da die vorgenemten V^olrich der Waibel mit siner hand vnd die vorgenemten Růdolf vnd Johans sin brůder, Engeldrût, Katherina, Anna vnd Agnesa ir swestren mit iren vnd mit des vorgenemten Walthers ir rehten vogtes handen an min hant offenlich vor geriht gantzlich vnd gar aller der reht, vordrung vnd ansprâch, so sú von reht ald von gewonhait an der vorgeschribenen Swaigalpp hatten ald hie nâch iemer gewinnen mo^ehtint, da mit sú ald ieman andre an ir stat ald von ir wegen den vorgenemten minen herren abt Herman ald ieman andre, wer die wa^erint, von der vorgeschribenen alpp wegen iemer angesprechen, bekúmberren oder bekrenken mo^ehtint in dehainen weg mit gaistlichem oder mit weltlichem geriht oder ân geriht. Vnd ist dis alles reht vnd redlich beschehen vnd vollefu^ert mit allen den worten vnd werken, so von reht ald von gewonhait darzů gehortent ald ho^eren soltent vnd notdurftig warent, vnd als reht, sitte vnd gewonlich was. Vnd ze ainem wâren vrkúnde vnd gantzer sicherhait aller der vorgeschribenen dinge henk ich Johans von Meldegge amman ze Huntwille da vorgenemt von des gerihtes wegen min insigel an disen brief. Wir die vorgenemten V^olrich, Růdolf vnd Johans die Waibel gebrůder, Engeltrut, Katherina, Anna vnd Agnês ir swestren vnd o^vch wir die vorgenemten Bartholome der Blarrer fúrsprech vnd Walther der Waibel vogt in der vorgeschribenen sache veriehent offenlich an disem brieue ainer gantzer wârhait aller der dinge vnd gedinge, so von v´ns an disem brief da vorgeschriben stant, vnd ze merer sicherhait der selben dinge so henken wir die vorgenemten V^olrich der Waibel, Bartholome der Blarrer fúrsprech vnd Walther der Waibel vogt in der vorgeschribenen sache v´nserú insigel an disen brief, vnd won wir die vorgenemten Růdolf vnd Johans die Waibel gebrůder, Engeltrut, Katherina, Anna vnd Agnesa ir swestren aigener insigel niht haben, so haben wir v´ns willeklich gebunden vnd binden v´ns mit disem brieue vnder des vorgenemten Walthers des Waibels v´nsers vogtes insigel, wâr vnd sta^et ze lassenn alles, daz von v´ns da vorgeschriben stat an disem brieue. Der geben ist an dem na^ehsten zinstag vor sant Johans tag des To^vffers ze sunnwendi, do man zalt von gottes gebúrt drúzehenhundert jar, fúnfzig jâr vnd darnach in dem dritten jâr.

Source Fulltext: Chartularium Sangallense VII, Nr. 4303, S. 193-195.