Allen den, die disen brief ansechent oder ho^erent lesen, kúnd ich Berchtold Snepfo vogt vnd || wir der rat der stat ze Rappreswil¹ vnd vergechen offenlich an disem brief, daz fúr vns kam || an offen gericht fro^vw Anna von Rúmlang² mit gesuntheit libes vnd der sinnen vnd gab da || vnbetwungenlich mit bedachtem můt luterlich durch got durch ir sel heiles willen alles ir gůt, dz si ietzo hat oder noch gewúnni, es wer ligendes oder varendes, klein oder gross, benemtz oder vnbenemtz, nach ir tod an den spital des heiligen geystes ze Rappreswil³, an allein ir versmitten^a) gewand, dz mag vnd sol si gen, wem si wil oder war si wil, vnd wenne si o^vch enist vnd von todes wegen ab gat, so sol dz egenand alles ir gůt, alz hie vorbenemmet ist, dem egenanden spital ledig vnd los vnd o^vch gevallen sin an aller menlichs wider red vnd geuerd, vnd sol den egenanden spital nieman sumen noch irren an dem egenanden ir gůt, dz si denne nach ir tod lasset, weder ir frúnd noch ir mag, wie die genant sint, mit gerichten geystlichen oder weltlichen noch an gericht, es si in stetten oder vf dem land, da mit der egenand spital an der vorgenanden erbschaft keines weges gesúmit oder geirret mo^echti werden, o^vch sol man wissen, wer, dz du egenand fro^vw Anna von Rúmlang in den egenanden spital kêmi, des si gewalt hat ze tu^enne, wenne es ir fu^eget, so mag vnd sol o^vch si ir gůt vnder ir handen han vnd da mit werbent sin vntz ze end ir wil, vnd sol si dar an nieman kunberren mit enkeinen dingen an alle geuerd. Vnd wan dis alles beschechen ist vor v´ns an offem gericht, alz vrteil vnd recht gab, vnd mit aller sicherheit ehafti worten vnd werken, so dar zů notdurftig sin mocht, so haben wir v´nser stat insigel offenlich gehenket an disen brief ze einer gezúgsami aller diser vorgeschribenen dingen. Ich Cůnrat von Echingen⁴ hern Johans seligen von Echingen ritters elicher sun vergich einr warhait aller der dingen, so hie vorgeschriben stand, dz ich hie bi gewesen bin vnd es gesechen vnd geho^ert han, vnd dar vmb so henke ich o^vch min insigel durch bette beider teilen an disen brief. Dis beschach vnd ward dir brief geben ze Rappreswil in der stat, do man zalt von gottes gebúrt drúzechen hundert jar, dar nach in dem drú vnd fúnfzigosten, an der mitwuchen vor sant Johans tag ze súmgichten^b).

Source Fulltext: Chartularium Sangallense VII, Nr. 4304, S. 195-196.