Ich Walther der Blarrer statamman ze sant Gallen¹ kúnd vnd vergich offenlich an disem brief allen den, die in ansehent, lesent oder ho^erent lesen, das fúr mich kam der from vest ritter her Bernhart der || Schenk von Landegge², do ich offenlich ze sant Gallen in der stat an des riches offenr strâsse ze geriht saz, vnd nam Johansen Wildrich burger ze sant Gallen ze fúrsprechen, der offenet offenlich vor geriht von || des selben her Bernhartz wegen vnd an siner stat, das der selb her Bernhart der Schenk von Landegge den êrsamen gaistlichen frowan fro Katherinen von Eppenberg a^ebtissenen vnd dem conuent gemainlich des closter || ze Maggenowe³ vnd ir nachkomen reht vnd redlich verko^vft vnd ze ko^vffen geben hett dú nachgeschribenn gu^eter vnd lút vnd was darzů gehorti, dú sin reht aigen wa^erin, vnd sint das dú gu^eter vnd die lút, die burg ze Landegge⁴, der hof ze Walaswand⁵, der hof ze Spilberg⁶, der hof ze Sigeswille⁷, die Aichwis⁸ vnd dú wis, die man nemmet Ba^echi⁹, vnd des Brenners gu^etli, vnd sint das die lút, Búrgi von Walaschwand vnd sin wip vnd a^ellú irú kint, Johans der Waibel von Spilberg vnd sin wip vnd a^ellú irú kint, vnd Ru^edi der Sprenger vnd sin wip vnd a^ellú irú kint, vnd das der vorgenemt her Bernhart die vorgenemten burg ze Landegge vnd die êgenemten ho^eue gu^eter vnd lút der êgenemten fro Katherinun a^ebtissenne vnd dem conuent gemainlich ze Maggenowe vnd ir nachkomen recht vnd redlich verko^vft vnd ze ko^vffen geben hett fúr recht aigen mit hofraitenen, mit akker, mit wisan, mit holtz, mit veld, mit wasen, mit zwi, mit wunn vnd mit waid, mit stegen, mit wegen, mit wasser vnd mit wasser flússen vnd mit aller êhafti vnd mit allen gewonhaiten vnd rechten, so zů der vorgenemten burg vnd zů den vorgenemten ho^euen gu^eter vnd lúten geho^erent, es sie benemt ald vmbenemt, gesůcht ald vngesůcht, vnd mit allen rechten, als er sie biz her vff disen húttigen tag gehept vnd genossen hett, vmbe drithalb hundert pfunt vnd vmbe vier pfunt pfenning alles gůter vnd ga^eber Costentzer múns, der selben pfenning er o^vch gantzlich vnd gar gewert wa^er vnd enpfangen hett von der êgenemten a^ebtissenen vnd dem conuent ze Maggenowe vnd die selben pfenning bekert hett an sinen offenn schinberen vnd gůten nutz, vnd batt mich der selb Johans Wildrich an des êgenemten her Bernhartz stat, das ich erfu^er an gemainer vrtaild, wie der egenemt her Bernhart der êgenemten fro Katherinun a^ebtissenen vnd dem conuent gemainlich ze Maggenowe die vorgenemten burg vnd die vorgenemten ho^eue gu^eter vnd lút mit allen den vorgeschribenen rechten vertgon vnd in ir hant bringen so^elt fúr recht aigen, won sú o^vch recht aigen wa^erint, als es kraft hett vnd sú no^vtdurftig wa^erint nu vnd o^vch hie nach. Das tett ich, vnd ward ertailt an gemainer vrtaild, sid dú vorgenemt burg vnd die vorgenemten ho^ef gu^eter vnd lút sin recht aigen wa^erint, das er denn an des rîchs offenn strâss gan so^elt vnd die egenemten burg vnd ho^ef gu^eter vnd lút mit allen den vorgeschribenen rechten an des rîchs strâss der obgenemten a^ebtissenen an des conuentes stat ze Maggenowe vf geben so^elt vnd sich der egenemten burg ho^ef gu^eter vnd lút gantzlich vnd gar in ir hant entzihen vnd frilich dauon gan. Darnach do gieng der êgenemt her Bernhart der Schenk, als im o^vch ertailt was vor geriht, an des rîchs offenn strass vnd gab da frilich vnd vmbetwngenlich der êgenemten fro Katherinun a^ebtissenen ze Maggenowe an des conuentes stat ze Maggenowe die vorgenemten burg ze Landegge vnd die êgenemten ho^ef gu^eter vnd lút mit allen den vorgeschribenen rechten mit aller êhafti vnd mit aller zůgeho^erd, als vorgeschriben stat, in ir hant vf fúr recht aigen, also das die êgenemt a^ebtissenne vnd der conuent ze Maggenowe vnd ir nachkomen die vorgenemten búrg ho^ef gu^eter vnd lút fúr recht aigen haben vnd niessen sond, vnd entzech sich o^vch da in der êgenemten a^ebtissenen hant gantzlich vnd gar fúr sich vnd alle sin erben vnd nachkomen aller recht aller ansprach vnd aller vordrung, so er zů der vorgeschribenen burg vnd zů den vorgenemten ho^euen gu^eter vnd lút ie gehatt ald iemer gehaben ald gewinnen mo^ehtin von aîgenschaft ald von dehainer ander sach wegen, vnd ist dis alles beschehen vnd vollefu^ert mit allen den worten werken vnd geta^eten, so darzů gehorten vnd no^vtdurftig wâren von recht vnd von gewonhait vnd als o^vch vor geriht mit gemainer vrtaild ertailt ward, das es kraft hett vnd haben so^elt nú vnd o^vch hie nach. Vnd des ze ainem waren vrkúnd vnd gantzer sicherhait aller der vorgeschribenn ding so han ich der êgenemt Walther der Blarrer min insigel von des gerihtes wegen gehenkt an disen brief, won es o^vch ertailt ward mit gemainer vrtaild, das ich es tůn so^elt. Ich Bernhart der Schenk von Landegge da vorgenemt ritter kúnd vnd vergich offenlich an disem brief fúr mich vnd alle min erben vnd nachkomen, das alles das war ist vollefu^ert vnd beschehen vnd das ich o^vch alles getan vnd vollefu^ert han, so hie vor an disem brief geschriben vnd beschaiden ist. Darnach vergich ich der selb Bernhart der Schenk fúr mich offenlich an disem brief vnd fúr alle min erben, das ich gesworn han ainen gelerten aît ze den hailgen willeklich mit vfgehabner hant, das ich vnd min erben der vorgenemten fro Katherinun von Eppenberg a^ebtissenen vnd des conuentes ze Maggenowe vnd ir nachkomen recht wern súllent sin nach recht vmb den vorgeschriben ko^vff vnd vmb die vorgenemten burg vnd die vorgenemten ho^ef gu^eter vnd lút, als ich sú verko^vft han, als vorgeschriben stat, gen ma^englichem an gaistlichem vnd an weltlichem geriht vnd wa sú sin no^vtdurftig sint, vnd wa^er, das die vorgenemt a^ebtissenne ald weli denn a^ebtissenne ze Maggenowe wa^er ald der conuent ze Maggenowe vmbe die vorgenemten burg ho^ef gu^eter vnd lút vmb a^ellú ald vmb dehaines sunderlich ald vmb dehainú recht, so dar zů geho^erent, dehainest angesprochen wurdin, wenn oder wie dik das bescha^ech, da sol ich sú verstan gen ma^englichem nach dem rechten vnd min erben, ob ich enwa^er. Hierúber so han ich der êgenemten a^ebtissenen vnd dem conuent ze Maggenowe vnd ir nachkomen ze merer sicherhait ze búrgen geben die êrsamen vesten ritter her Cůnrat den Schenken von Landegge¹⁰, her Johansen von Haidelberg¹² vnd die wolbeschaiden Růdolf von Rosenberg¹² Eglolfs sa^eligen sun von Rosenberg, V^olrich den Giel den êltern von Glatburg¹³ vnd V^olrich den Giel den jungern von Glatburg¹⁴ kilchherren ze Helffentswille¹⁵ vnd Walther den Blârrer statamman ze sant Gallen, der ieliche gesworn hat ainen gelerten aît ze den hailgen mit vfgehabnen handen, ze laistenn vnd ze vollefu^eren, als hie nachgeschriben stat an disem brief, wa^er das ich ald min erben, ob ich enwa^er, die vorgenemten a^ebtissenen vnd den conuent ze Maggenowe ald ir nachkomen nit fúrspra^echin noch verstu^endin nach dem rechten vmb die vorgenemten burg ho^ef gu^eter vnd lút, von wem sú darumb anspra^echig wúrdint, als vorgeschriben stat, oder wa^er das die a^ebtissennen vnd den conuent ze Maggenowe dehain gebrest angieng ald anviel von mir ald von minen erben ald von ieman andren von v´nsren wegen vmb die vorbenemten burg ho^ef gu^eter vnd lút von allen ald von dehainem sunderlich ald in dehainú recht, so darzů geho^erent, wenn mich denn ald min erben, ob ich enwa^er, die a^ebtissenne ald der conuent ze Maggenowe darumb ermanent ze hus ze hof ald vnder o^vgen mit ir gewissen botten oder mit ir brieuen, so sol ich vnd min erben, ob ich enw^er, bi dem aît, den ich darumb gesworn han ze den hailgen, das vsrihten vnd die a^ebtissenen vnd den conuent ze Maggenowe darumb entrihen fúrsprechen vnd verstan vnd in den gebresten ablegen, darumb sú dann ie mich ald min erben gemant hand, vnd sol ich vnd min erben, ob ich enwa^er, das tůn vnd vollefu^eren ân fúrzug inrent dem na^echsten manot nach ir manung. Ta^et ich ald min erben, ob ich enwa^er, das niht, wenn ich denn ald die vorgenemten búrgen von der a^ebtissenen vnd dem conuent ze Maggenowe ald von ir gewissen botten ald mit ir brieuen ermant werdent ze hus ze hof ald vnder o^vgen, so sol ich vnd die êgenemten búrgen bi dem aît, so wir darumb ze den hailgen gesworn haben, v´ns antwúrten an allen fúrzug gen sant Gallen ald gen Bischofcelle¹⁶ ald gen Wil¹⁷, in weli der driier stett ain wir wellen, inrent den na^ehsten aht tagen nach der manung vnd sond da reht giselschaft laisten vngeuârlich in offener wirt húser bi vailem gůt vnd niemer von der giselschaft ze komen noch ze lassen won mit der a^ebtissenen vnd des conuentes ze Maggenowe willen vnd ê das der a^ebtissenen vnd dem conuent ze Maggenowe das vsgeriht vnd gantzlich vollefu^ert wirt, darumb sú v´ns dann ie ermant hant von der vorgenemten burg ho^ef gu^eter vnd lút wegen. Gescha^ech o^vch, das der vorgenemten búrgen dehaine von todes wegen abgieng ald von andren sachen vnnútz wúrdi, so sol ich ald min erben, ob ich enwa^er, der a^ebtissenen vnd dem conuent ze Maggenowe ainen andern búrgen an des stat geben, der als gůt vnd als gewisse sie als der was, der abgangen ist, darnach inrent dem na^ehsten manot, so ich ald min erben darumb ermant werdent von der a^ebtissenen vnd dem conuent ze Maggenowe ald von ir gewissen botten ald mit ir brieuen ze hus ze hof ald vnder o^vgen, als vorgeschriben stat. Ta^et ich ald min erben das niht, so sol ich vnd die andern búrgen bi dem aît, so wir gesworn haben, recht giselschaft laisten, wenn wir darumb ermant werdent, als vorgeschriben stat, vntz das in der búrg geben wirt, wele o^vch vnder den vorgenemten búrgen niht selb laisten mag noch wil, der sol ainen kneht mit ainem maiden an sin stat legen, der die giselschaft laist in allem dem rechten vnd o^vch als túr kom vngeuârlich, als ob er selb laisti vnd laisten sol. Ich der egenemt Bernhart der Schenk ritter vergich o^vch offenlich an disem brief, das ich gesworn han ainen gelerten aît ze den hailgen, wa^er das her Cůnrat den Schenken von Landegge ritter, Johansen von Múnchwille¹⁸ vnd Johansen den Múnser burger ze sant Gallen dúchti bi iro êran ald das es an sú braht ald das sú des vnderwist wúrdin von der a^ebtissenen ald dem conuent ze Maggenowe, das sú drie ald der mer tail vnder in sich erkandin, das ich ald min erben, ob ich enwa^er, die a^ebtissenen vnd den conuent ze Maggenowe vmb die vorgenemten burg ho^ef gu^eter vnd lút fúrbas vnd me besorgen so^elt dann sú versorget sint mit disem brief, was die selben drie ald der mer tail vnder in mich ald min erben, ob ich enwa^er, darumb haissent tůn, das sol ich vnd min erben, ob ich enwa^er, tůn vnd vollefu^eren ân allen fúrzug, wenn mir ald minen erben, ob ich enwa^er, das von den selben drin ald von dem meren tail vnder in gesait ald verkúndet wirt mit ir botten ald mit ir brieuen ze hus ze hof ald vnder o^vgen, vnd súllen o^vch das tůn vnd vollefu^eren in den tagen, als v´ns die selben drie haissent vnd verkúndent. Wa^er o^vch, das vnder den selben drin dehainer abgieng von todes wegen, so sont die andern zwen ainen andern an des stat nemen, der abgangen ist, der sú darzů gůt dunkt, vnd sol o^vch der denn in allen rehten sin als der was, der abgangen ist. Wa^er aber, das ich ald min erben niht vollefu^ertin, als v´ns die vorgenemten drie ald der mertail vnder in vmb dú vorgeschriben sach hiessin ald verkúntin, so sol ich vnd die vorgenemten búrgen bi dem aît giselschaft laisten, wenn wir darumb ermant werdent, als vorgeschriben stat, vntz daz der a^ebtissenen vnd dem conuent ze Maggenowe gantzlich vollefu^ert wirt, darumbe wir denn ermant sint. Ich hab o^vch gesworn ainen gelerten aît ze den hailgen, das ich die vorgenemten búrgen lo^esen vnd ledgen sol von allem dem schaden, in den sú koment von der vorgeschriben búrgschaft vnd giselschaft wegen, vnd hant o^vch darumb gewalt, mich vnd min erben, ob ich enwa^er, ze pfendenn vnd ze no^etenn an lúten vnd an gůt, wie ald wa sú das getůn mugent mit geriht ald ân geriht, vntz das sú gantzlich vnschadhaft werdent von der vorgeschribenen búrgschaft vnd giselschaft vnd pfandung wegen. V´ber dis alles so han ich mich entzigen vnd entzieh mich mit disem brief fúr mich vnd alle min erben vnd nachkomen alles schirmes, alles rechten, aller helf vnd aller gesetzt, die ietz sint ald hernach werdent von gaistlichem ald von weltlichem geriht, vnd alles des, da mit der vorgeschriben ko^vff vnd die vorgeschriben sachen vnd geding bekrenkt mo^ehtint werden in dehainen weg von mir ald von minen erben ald von ieman von v´nseren wegen ald an v´nser stat. Vnd des ze ainem waren vrkúnd vnd gantzer sicherhait aller der vorgeschribenn ding vnd geding so henk ich der vorgenemt Bernhart der Schenk ritter min insigel an disen brief fúr mich vnd alle min erben. Wir die vorgenemten búrgen Cůnrat der Schenk, Johans von Haydelberg bed ritter, Růdolf von Rosenberg, V^olrich der Giel der êlter, V^olrich der Giel der junger vnd Walther der Blarrer veriehen offenlich an disem brief, das alles das war ist, so von v´ns an disem brief da vorgeschriben stat, vnd das wir ôch gesworn haben gelert aît ze den hailgen ze laistenn vnd ze vollefu^eren, als an disem brief von vns beschaiden ist vnd geschriben stat. Vnd des ze meren sicherhait so haben wir o^vch v´nseri insigel gehenkt an disen brief. Der geben ward ze sant Gallen in der stat an dem na^ehsten samstag vor sant Thomas tag des zwelfbotten, in dem jar, do man zalt von gottes gebúrt drúzehenhundert jar, fúnfzig iar vnd darnach in dem dritten jare.

Source Fulltext: Chartularium Sangallense VII, Nr. 4335, S. 219-223.