Wir Fides von gottes gnaden eptischin des gotzhûs Zúrich¹ sant Benedicten Ordens in Costentzer bistům kv´nden allen, die || disen brief sehent oder ho^erent lesen, das fúr vns kam fro Angnesa Růdolf seligen Horwers elichú tochter mit Johans Goltstein ir || erkornem vogte vnd da mit dez selben ir erkornen vogtes hant gunst vnd gůtem willen ir halben juchert reben, die gelegen || sint an Signo^vwe² vnd einhalb stôssent an Heinrich des Swartzenmvrers gůt, anderthalb an Hartman Rordorfs gůt, dú erbe ist von vnserm gotzhus vmb einen semlichen cins, als an des selben vnsers gotzhus cinsbůchen vnd ro^edeln geschriben stat, mit stege mit wege vnd sunderlich mit allem recht frijeheit vnd êhafti, so dar zů geho^eret, ledeclich an vnser hant ze vnsers gotzhûs wegen vf gab, vnd bat vns, die selben halben juchert reben mit allem recht, so dar zů geho^eret, lihen den erbern geistlichen frowen swester Annen von gottes gnaden eptischin dez gotzhus des^a) Wurmspach³ dez ordens von Citels in Costentzer bistům vnd dem conuent gemeinlich dez selben gotzhus, vnd durch ir vnd ir erkornen vogtes bette so haben wir die vorgeschriben halben juchert reben mit allem recht, so dar zů geho^eret, verlihen der vorgenanden eptischin vnd dem conuente dez gotzhus ze Wurmspach vnd ir nachkomen ze rechtem erbe vmb den vorgeschriben cins. O^vch sol man wissen sunderlich, daz dú selbe swester Angnesa Horwerin dis vorgeschriben halben juchert reben mit allem recht, so dar zů geho^eret, in lipdinges wise haben vnd niessen sol vntz ze ende ir wîle, vnd entzihet sich her vmbe gentzlich mit dez êgenanden ir erkornen vogtes hant gunst vnd gůtem willen fúr sich vnd fúr ir erben, die si her zů bindent, allez dez rechten vorderung vnd ansprache, so si nach der erbschaft der vorgeschriben halben juchert reben mit allem recht, so dar zů geho^eret, vnschedlich ir lipdinge gen der obgenanden eptischin vnd dem conuente dez gotzhûs ze Wurmspach oder gen ir nachkomen beide vor geistlichen vnd vor weltlichen gerichten dekeine wîse iemer gehaben mo^echte. O^vch hat dú selbe swester Angnesa Horwerin mit dez êgenanden ir erkornen vogtes hant gunst vnd gůtem willen globt fúr sich vnd fúr ir erben, die si her zů bindet, der vorgeschriben halben juchert reben an Signowe mit allem recht, so dar zů geho^eret, ir selber vnschedlich an ir lipdinge wer ze sinne der vorgenanden eptischin vnd des conuentes dez gotzhus ze Wurmspach vnd ir nachkomen fúr ein recht erbe von vnserm gotzhûs vmb den vorgeschriben zins beide vor geistlichen vnd vor weltlichen gerichten vnd mit namen an allen stetên, wa oder wenne man sin bedarf, mit gůten trewen âne alle geuerde. Vnd hier v´ber ze einem wâren vnd stêten vrkúnde so geben wir inen disen brief vns vnd vnsers gotzhus zinsen vnd rechten vnschedlich mit vnserm insigel offenlich besigelt. Dis geschach vnd wart o^vch diser brief geben Zúrich an dem nechsten donrstag nach sant Martins tag, do von gottes geburt waren drútzehen hundert vnd fúnftzig jar vnd dar nach in dem dritten jare. Da ze gegen waren Johs. von Hottingen⁴ schultheisse, meister Růdolf der artzat, Go^etz von Adlinkon⁵, V^olr. Krieg, Ru^od. Bremgarter vnd ander erber lúte.

Source Fulltext: Chartularium Sangallense VII, Nr. 4327, S. 212-213.