Allen, die disen brief sehent oder ho^erent lesen, kúnden wir swester Anna ebtischin vnd gemeinlich der conuent des gotzhus ze Wrmspach¹ Citels ordens Kostentzer bisthom vnd veriehen offenlich an disem brief fúr vns vnd vnser nachkomen iemer ewiklich vmb dz hus, das^a) Zúrich vnder obern Zúnen² gelegen ist, daz einend an Johans des Etern hus vnd andrent an des Manessen garten stosset, dz vns vnd vnserm^b) gotzhus geben vnd gefu^egt hat swester Angnese Růdols^c) seligen Horwers^d) tohter vnsers conuentz klosterfro^vwe durch got vnd vmb ir sele heiles willen vnd v´ns geuertigot ist von dem erwirdigen herren hern Růdolf von Wartense probst des gotzhus Zúrich³ zů des selben gotzhus wegen, von dem o^vch dz selbe hus mit allem recht, so darzů geho^eret, erb ist, dz das ieklichi ebtischin, welú iemer ebtischin wirt ze vnserm gotzhus, von dem vorgenanten hern Růdolf von Wartense probst vnd von sinen nachkomen, weller iemer probst wirt ze dem obgenanten gotzhus, nach dem mal, so er probst wirt, oder nach dem^e) mal, so och^f) vnser fro^vwen einú ebtischin wirt, empfahen sol ze erb, als recht ist, inrent jares frist, were aber, das das nicht beschehe, so sol das vorgenant hus mit allem recht, so darzů geho^eret, dem obgenanten gotzhus Zúrich gar vnd ga^entzlich ledig vnd lôs sin. Vnd har úber ze einem waren vnd steten vrkúnd alles des, so vorgeschriben ist, hab ich dú vorgenant swester Anna ebtischin ze Wrmspach ze des selben gotzhus wegen disen brief besigelt mit minem insigel offenlich, dar vnder wir der vorgenant conuent ze Wrmspach vns willeklich binden an disen brief. Der geben wart Zúrich an dem nechsten zinstag nach sant Martis tag, do man von gottes gebúrt zalte drúzehen hundert jar vnd dar nach in dem drú vnd fúnfzigosten jare.

Source Fulltext: Chartularium Sangallense VII, Nr. 4326, S. 211-212.