Allen den, die disen brief lesent oder ho^erent lesen, kúnd ich Herman der junge Kupferschmid burger ze Wil¹ vnd vergih offenlich an disem || brief fúr mich vnd fúr mine erben, dz ich mit wolbedahtem râte vnd mit gůter beschaidenhait durch miner vnd durch Vrsellun Cůnratz || dez Kamerers tohter wilunt miner elichun wirtenne selan willen abe der wise, dú min aygen ist vnd gelegen ist ze Wîl vf Wilmatt² zw´sch||ent der kilchun wise vnd Eberhartz dez Trůngers wise, reht vnd redelich geben gesetzet vnd geordenot han dem conuent der sa^emenung ze Wil³, die wîle der conuent da ist, an den tissche drie schilling pfenning gůter Costentzer múns geltes mit der beschaidenhait, dz ich vnd mine erben ald wer denne die wise inne het vnd nússet dem selben conuent die selben pfenning ja^erklich gar vnd gantzlich von der vorgenandun wise rihten vnd geben so^ellint ane allen fúrzug vnd ane alle wider rede vff den na^ehsten ma^entag nach dez hailigen crúces tag ze herbest, ta^etint wir dez nit, so het der vorgenand conuent vnd an lúpriester ze Wil reht vnd gewalt, die selbun wise ane fúrzug vnd ane wider rede min vnd miner erbun ze besetzen vnd entzetzenn in aller wîse vnd in allem reht, als an dem brief⁴ gescriben stat, der an lúpriester ze Wil von mir vmb min vnd miner vorgenandun wirtenn jarzit inne het, vnd sol och der selb conuent min vnd miner vorgenandun elichun wirtenn jarzit vf den vorgescriben ma^entag ja^erklich began mit ainer vigilie ald mit anderm gebette, dú den salter nit kúnni. Vnd ze merer sicherhait aller vorgescribener ding henk ich Herman der vorgenand Kupferschmid min insigel fúr mich vnd fúr mine erben an disen brief. Dis geschach vnd wart dirre brief geben ze Wîl in der stat an sant Andres abent, do von gottes gebúrt warent drútzehenhundert jar, fúnfzig jar, dar nach in dem dritten jar.

Source Fulltext: Chartularium Sangallense VII, Nr. 4332, S. 216-217.