Ich Johans von Twingenstain¹ ritter tůn kunt vnd vergihe offenlich an disem brief allen den, die in ansehent || oder ho^erent lesen, daz ich mit gůter williger vorbetrachtung minen hoff, der gelegen ist in den Owen², da Cůnrat || von Frûmenwiler³ vnd sin svn . . der maiger vf sitzet, der min reht lehen ist von dem gotzhus ze sant Gallen, mit || ackern mit wisan mit holtz mit veld mit sta^egen vnd mit wa^egen mit wunne mit waide mit wazzer mit ehafti vnd mit allen den gewonhaiten vnd rechten, so dar in vnd dar zů geho^erent, vnd als ich vnd min vordern in herbracht habin, dem ersamen manne Berchtolt dem eltern Kesseler⁴ von Ostra⁵ vnd sinen erben in pfandes wîs vnd ze ainem rechten redlichem pfande vnd ze allem rechte versetzet han vúr mich vnd vúr min erben vmb vier vnd zwaintzig pfunt pfenninge gůter vnd gna^emer Costentzer mv´ns, die er mir hút zetage, als dirre brief geben ist, bezalt vnd gelúhen hat, der ich von im ga^entzlich gewert bin nah minem nvtz vnd willen, vnd han o^vch dem selben Berchtolt dem Kesseler vnd sinen erben den vorgedahten hoff vnd alle sin zůgeho^erd gevertgot mit dez erwirdigen abt Hermans von sant Gallen⁶ hand, als ain man ain so^elich lehen billich vnd von recht vertgon sol, vnd súlin o^vch ich vnd min erben sin vnd siner erben, wa si sin notdúrftig werdent, diss vorbenempten hofs vnd pfands wa^ern sin, als recht ist, ez sige vff gaistlichem ald vff weltlichem gericht, vnd a^vn alle geuerde. Wenne o^vch ich ald min erben den vorgenanten Berchtolt den Kesseler ald sin erben, ob er enwere, mit vier vnd zwaintzig pfunden gůter vnd gna^emer Costentzer pfenninge ermanin vnd in die gebind, so sont si v´ns vorgedahten hoff vnd alle sin zůgeho^erd ledig lan, mit so^elicher beschaidenhait, welhes jars dú selb losung beschicht vor sant Johans tag dez To^vffers ze sv´nwenden, so sol v´ns der hof vnd die nv´tze von dem selben jar ga^entzlich ledig sin, welhes iars aber dú selb losung beschehen wirt nah sant Johans tag ze sv´nwenden, als vorgeschriben stat, so sol der nvtz von dem selben jar dem vorgenanten Berchtolt dem Kesseler vnd sinen erben werden. Dirre vor geschribener dinge ze vrkúnde der warhait gib ich vorgenanter Johans von Twingenstain ritter disen brief mit minem aigen insigel besigelten. Der geben ist ze Rinegg⁷, in dem jar, do man zalt von Crists gebúrt drúzehen hvndert jar vnd in dem vier vnd fúnftzigostem jar, an dem nehsten fritag nah dez hailigen crútz tag ze maigen.

Source Fulltext: Chartularium Sangallense VII, Nr. 4352, S. 234-235.