Ich Cůnrat Pfefferhart Stattamman ze Costentz¹ tůn kunt allen, die disen brief an sehent oder ho^erent lesen, daz || fúr mich kam fúr offen geriht Johans Bo^esch, Agnes, Katherin vnd Fren sin swo^esteran, wilont Frantzen sa^eligen || Bo^eschen kinde, vnd offenotant mit fúrsprechen, si hettint minem herren graf Fridrichen von Toggenburg² || reht vnd redelich vnd eweklich ze koffent geben iro zehenden ze Lomâs³ vnd Sigis gůt mit allen den rehten, so dar zů horti, es wa^er von lehenschaft ald in pfandes wis ald wie es iro vatter sa^elig vnd iro můter sa^elig inne hettint gehaben vnd an sú hettint bracht, es wa^er benempt oder vnnempt^a), also hettint och sú im den selben zehenden vnd Sigis gůt gesunt libes vnd můtes nach iro frúnd vnd ander erba^erer lút rât ze kofent geben vmb vierú vnd sechzig pfunt pfenning gůter vnd gena^emer Costentz múns, der sú och von dem obgenanten minem herren von Toggenburg gar vnd ga^entzlich gewert wa^erint vnd die in iro redlichen nutz kumen vnd bekert wa^erint, vnd offenotent och dabi sich des obgenanten zehenden vnd Sigis gůtz entzihen vnd vff geben mit allen rehten in V^olriches hand von Lo^enberg⁴, der da von des obgenanten mines herren von Toggenburg wegen den selben zehenden vnd Sigis gůt enphahen welt, vnd batent inen ze ervarn an ainer vrtail, wie sú im dú selben gu^eter vertigon so^eltint, als reht wa^er vnd als es kraft hett. Do wart ertailt mit reht gesamnoter vrtail, sid daz der vorgenant Johans Bo^esch der obgenanten siner swesteran rechter vogt wa^er, daz sú denn alle vierú dar giengint vnd da vnverschaidenlichen vor geriht sich des vorgenanten zehenden vnd Sigis gůt mit allen rehten entzigint in V^olriches hand Lo^enbergs an des vorgenanten mines herren statt von Toggenburg, vnd daz es denn wol kraft vnd macht hett, daz vollefůrtent och die vorgenanten Johans Bo^esch, Agnes, Katherin vnd Fren si swo^esteren da offenlichen vor geriht, als inen ertailt ward. Vnd des ze vrkúnd gib ich der vorgenant amman min insigel an disen brief. Dar nach vergich ich der vorgenant Johans Bo^esch ainer gantzer warhait aller diser vorgeschribner ding, vnd des^b) ze vrkúnd gib ich och min insigel an disen brief. Der ist ze Costentz geben, do man von^c) Cristes gebúrt zalt drúzehen hundert jar, dar nach in dem vier vnd fúnfzegosten jar, an dem hailgen abent ze pfingsten.

Source Fulltext: Chartularium Sangallense VII, Nr. 4353, S. 235-236.