Ich Hans von Haidelberg¹ ritter vnd ich Ita² sin elichú wirtinn vergehen offenlich mit disem brief, daz vns der || erwirdig vnser gena^ediger herr her Johans byschof ze Kostentz³ geriht vnd gewert ha^vt hundert vnd || zwainzig march silbers Kostentzer gewihtes vnd hundert pfunt Kostentzer múns von des satzz vnd || phandes wegen der burg vnd stat ze Byschofcell⁴ vnd swas darzů geho^ert, won das vnser pfant gewesen ist, vnd haben wir darumb dem selben vnserm herren byschof Johansen vnd sinem gotzhus die selben burg vnd stat ze Byschofcell mit aller zůgeho^erd geantwúrt vnd gentzlich ledig gelazzen. O^vch hab ich vorgen(ante) Ita ainen ayd gesworn ze den hailigen, daz ich ze dem egenanten minem herren byschof John. oder sinem gotzhus vnd nachkomen dehain ansprâch haben sol zů dem vorgenanten phand burg vnd stat ze Byschofcell vnd was darzů geho^ert, darûf ich von minem wirt miner hainstúr vnd wider legung gewiset was, der ich mich entzich vnd entzigen hab bi dem selben ayd, den ich darumb ze den hailigen gesworn hab, die verzihnúst ich ouch getan hab mit so^elichen worten vnd werken, als darzů notdúrft ist. Vnd ich der vorgenant Hans von Haidelberg hab ouch ainen ayd ze den hailigen gesworn, daz ich ze dem egenanten minem herren byschof Johansen oder sinem gotzhus vnd nachkomen dehain ansprach zů dem vorgenanten phand burg vnd stat vnd was darzů geho^ert haben sol. Vnd des ze ainem v^rkúnd geben wir disen brief versigelt mit vnsern baiden anhangenden insigeln vnd mit Hansen von Stainach⁵ minr vorgenanten Iten brůder insigel, der sin insigel ouch durch vnser bett ze ainer zúgn[ú]st gelait hat an disen brief. Ich Hans von Stainach vergich, das ich durch miner vorgenanten swester Iten vnd des egenanten hern Hansen von Haidelberg mines swager bett min insigel gelait han an disen brief. Der geben ist ze Byschofcell an fritag vor sant Gallen tag, do man zalt von Cristus gebúrt drútzehenhundert jar, darnach in dem vierden vnd fúnfzigosten jar.

Source Fulltext: Chartularium Sangallense VII, Nr. 4377, S. 247-248.