Wir die nachgenemten V^olrich Steffan, V^olrich Eberhart vnd V^olrich Johans genemt von Sax¹ gebrůder tu^en kunt vnd veriehent des offenlich mit disem brief || fúr v´ns vnd alle v´nser erben allen, die in ansehent, lesent oder ho^erent lesen, daz v´ns der erwirdig v´nser gna^ediger herre von gottes gnâden abt Herman || abt des gotzhus ze sant Gallen² gantzlich vnd gar geben, beriht vnd vergolten hât alles, daz er v´ns vntz her vff disen húttigen tag, als dirre brief geben || ist, schuldig was vnd gelten solt von der dienst wegen, die wir im gen Zúrich getân habent, vnd o^vch von der verlust, die wir von der selben dienst wegen gehept habent, daz er v´ns da von noch da bi niht mêr schuldig ist noch gelten sol noch wider geben, won er v´ns o^vch gantzlich vnd gar ledig gelâssen hât aller der dienst, die wir im fúrbas gen Zúrich gelobt hattent ze tu^enne. Vnd won er v´ns gantzlich vnd gar gewert hât alles, daz er v´ns vntz her schuldig worden ist von der vorgeschribenen dienst wegen, vnd er v´ns o^vch gantzlich ledig gelassen hât aller der dienst, die wir im fúrbaz gelobt hattent ze tu^enne, als vor ist beschaiden, darumb so lâssen wir die vorbenemten von Sax gebrůder fúr v´ns vnd alle v´nser erben den vorbenemten v´nsern gna^edigen herren abt Herman vnd sin vorbenemt gotzhus ze sant Gallen von aller der sach wegen, darumb wir in an ze sprechenn hattent von der vorgeschribenen dienst wegen, gantzlich vnd gar ledig vnd los mit disem brieue. Es wa^er dann, daz Růdolf von Rosenberg, den man nemmet von Zukkenriet³, ald sin erben, ob er enwa^er, v´ns ald v´nser erben, ob wir enwa^erint, anspra^echent vnd notint von des maydens wegen, den im her Cůnrat der Schenk von Landegg⁴ ritter vff v´ns vnd von v´nsern wegen verko^vft hât von der vorgeschribenen v´nser dienst wegen, da haben wir v´ns vnd v´nsren erben von des selben maidens wegen gen dem vorbenemten v´nserm herren abt Herman vnd sinem vorbenemten gotzhus a^ellú v´nserú reht behalten. Wir behalten o^vch dem vorbenemten v´nserm herren abt Herman vnd sinem vorbenemten gotzhus a^ellú dú reht, die sú hant ald haben mugent von des selben maydens wegen zů v´ns vnd allen v´nsern erben. Vnd ze ainem wâren vrkúnde vnd gantzer sicherhait aller der vorgeschribenen dinge vnd gedinge so habent wir die vorbenemten V^olrich Steffan, V^olrich Eberhart vnd V^olrich Johans genemt von Sax gebrůder fúr v´ns vnd alle v´nser erben v´nserú insigel gehenkt an disen brief. Der geben ist in der stat ze sant Gallen, an der na^ehsten mitwuchen vor sant Johans tag des To^vffers ze sunnwenden, in dem jar, do man zalt von gottes gebúrt drúzehenhundert jar, fúnfzig jar vnd darnach in dem fúnften jare.

Source Fulltext: Chartularium Sangallense VII, Nr. 4405, S. 264-265.